Ambasadorët e kombit tonë në diasporë, Qemal dhe Kozeta Zylo

Nga Ylli  M. Dilo 

Vlerat universale të qytetërimit perëndimor gërshetuar me mbajtjen gjallë dhe  forcimin e ndjenjës kombëtare janë mbrujtur në mënyrë ideale në kontributin e shquar të çiftit Zylo. 

Si një jehonë që valëvitet në hapësirë, tingujt e TV “Alba Life”, mbushin me optimizëm zemrat e gjithë shqiptarëve në Diasporë dhe kudo në Atdhe.

Mesuese Kozeta dhe Ing. Qemali të përkushtuarit dhe të palodhurit, janë dy themeluesit dhe producenët e TV “Alba Life” dhe të Shkollave Shqipe me të njëjtin emër në SH.B.A. të cilat për 15 vjet rresht japin kontributin e tyre të çmuar.

Familja Zylo në New York dhe më gjërë për aktivitetin e saj kulturor dhe patriotik i ka kaluar caqet e Ambasadorit te Kombit.

Ku e ka burimin kjo veprimtari e shquar?

Kanti dhe Schelling në filozofinë e tyre na mësojnë se qartesia e mendimit dhe energjia e vullnetit janë të lidhura në mënyrë të pandashme.

Ky çift model intelektualësh mbështetur në këtë bindje filozofike ka arritur rezultatet e kësaj drite vezulluese që percjellë kulturë, mirësi, dlirësi dhe patriotizëm. Besimi se çdo majë mund të arrihet, e ka bërë këtë çift të bekuar.

Pak dritë mbi jetën dhe veprimtarinë e tyre

Kozeta u lind në Mezhgoran, Tepelenë nga prindërit Brahim dhe Liri Gjoni.

Pas mbarimit të Universitetit, dega Gjuhë-Letërsi punoi 20 vjet mësuese në gjimnazet e Tiranës.

Në shkurt 1997 emigroi në SHBA bashkë me familjen e saj: Ing. Qemal Zylo dhe dy vajzat.

Vazhdoi kualifikimet pas-universitare. Punoi si pedagoge disa vite në “Globe Institute of Technology”. Vazhdon të punojë në programin e Autizmit në shkollën e mesme “Susan E. Wagner” në Staten Island.  

Është autore e mbi 8 librave në poezi, proze, kritikë, esse, reportazhe dhe studime me vlerë.  Ka gati për botim gjithashtu dhe dy libra të tjerë.

Shkrimet e saj botohen në gazetat “Illyria” dhe “Dielli” si dhe shumë gazeta të tjera.

Libri i saj “Diaspora si krah shqiponje” ka zenë vend në Bibliotekën e Kongresit Amerikan si  dhe në Bibliotekat në Manhattan e Brooklyn NY, të cilat janë Bibliotekat më të mëdha në U.S.A.

Kijimtaria e Znj. Zylo ka tërhequr vemendjen dhe ka marrë vlerësime nga personalitete të larta të kulturës kombëtare si: Ismail Kadare, Prof.Petter Prifti, Prof. Sami Repishti, shkrimtari i shquar Agim Shehu, Helena Kadare, Dr. Gjeke Marinaj, etj.

Çifti Zylo është vleresuar nga Presidenti i Republikës së Shqipërisë me titullin “KALORËSI I URDHRIT TË FLAMURIT”.

Zonja Zylo është vlerësuar nga organizata e gruas shqiptaro amerikane “Motrat Qiriazi” me çmimin e lartë “Gruaja e Vitit 2022”. 

Ing. Qemal Zylo ka punuar pedagog në “Globe Institute of Technology”, Manhattan, ka qenë shef i Katedrës në Akademinë Ushtarake dhe ka dhënë mësim në lëndët inxhinierike Tiranë.

Ata vazhdojnë me sukses prej 15 vite drejtimin e shkollave shqip ne gjithe Nju Jorkun dhe në Online si dhe TV ”Alba  Life”. Mësimi ne Online është një nga metodat që përdorin atje ku nuk ekziston mundesia e hapjes së shkollave.

Ju urojmë suksese Ambasadorëve të Kombit tonë , çiftit Kozeta dhe Qemal Zylo!

20 tetor, 2022

Sheper, Shqipëri