Anija e parë me drithë nga Ukraina vazhdon rrugën drejt Libanit

Stamboll, 3 gusht 2022 – në Turqi ka pwrfunduar inspektimi i anijes së parë që po transporton drithë nga Ukraina dhe ajo së shpejti pritet të kalojë nëpër ngushticën e Bosforit në udhwtimin drejt destinacionit përfundimtar, Libanit.

Anija transportuese, Razoni, që është e regjistruar në Sierra Leone, e cila ka arritur në brigjet turke paraditen e 3 gushtit, po transporton mbi 26.000 tonë misër.

Ministria turke e Mbrojtjes tha se inspektimi u krye nga një ekip prej 20 personash.

Sipas marrëveshjes, inspektimi i drithit bëhet nga një qendër e posaçme e përbashkët koordinimi, e përbërë nga zyrtarë civilë dhe ushtarakë nga Ukraina dhe Rusia, si dhe delegatë nga Turqia dhe OKB-ja.

Në përputhje me procedurën që palët kanë rënë dakord, inspektimet nuk do të bëhen në vetë portin e Stambollit, por në det, në ngushticën e Bosforit që lidh Detin e Zi me Deti Marmara dhe në detin Egje.

Mediat janë paralajmëruar të qëndrojnë larg anijes.

Admirali turk, Ozcan Altunbulak, koordinator në qendrën e përbashkët, tha se “përgatitjet dhe planifikimi” po vazhdojnë për anijet e tjera që pritet të largohen nga portet e Ukrainës.

Një zyrtar i lartë turk i paidentifikuar i tha Reutersit më herët më 2 gusht se Ankaraja pret që afërsisht një anije me drithë të largohet çdo ditë nga portet ukrainase për aq kohë sa ekziston marrëveshja e ndërmjetësuar nga OKB-ja.

Sipas marrëveshjes së ndërmjetësuar nga Turqia dhe Kombet e Bashkuara, eksportet e grurit ukrainas nga tri porte të Detit të Zi do të rikthehen në nivelet e paraluftës, prej rreth 5 milionë tonë në muaj.

Ukraina është një nga eksportuesit më të mëdhenj në botë të grurit, misrit dhe vajit të lulediellit, por pushtimi i vendit nga Rusia dhe bllokada e saj detare e porteve të Ukrainës i kanë ndaluar dërgesat.

(REL)

Comment

*