Besiana Kadare lirohet nga detyra e ambasadores në OKB, kthehet në detyrën e ambasadores në UNESCO

Tiranë, 1 tetor 2021 – Besiana Kadare, vajza e shkrimtarit shqiptar me fame botërore, Ismail Kadare, është liruar nga detyra e Ambasadores së Jashtëzakonshme dhe Fuqiplotë të Republikës së Shqipërisë pranë Organizatës së Kombeve të Bashkuara, në Nju Jork.

Ajo është liruar nga kjo pozitë me dekret të Presidentit Ilir Meta, me propozimin e Kryeministrit Edi Rama.

Por, Besiana Kadare është emëruar me një dekret të dytë Ambasadore e Jashtëzakonshme dhe Fuqiplotë i Republikës së Shqipërisë në Organizatën e Kombeve të Bashkuara për Edukim, Shkencë dhe Kulturë (UNESCO). Ajo ka qenë ambasadore e Shqipërisë në UNESCO para se të dekretohej Ambasador e Jashtëzakonshme dhe Fuqiplotë të Republikës së Shqipërisë në Organizatën e Kombeve të Bashkuara, në Nju Jork.

Në vend të zonjës Kadare, Ambasador i Jashtwzakonshwm dhe Fuqiplotw i Republikws sw Shqipërisë në OKB është emëruar Ferit Hoxha, i cili deri më sot ishte Ambasador i Jashtëzakonshëm dhe Fuqiplotë i Republikës së Shqipërisë në UNESCO.

Njoftim i Institucionit të Presidentit të Republikës për lirimin nga detyra të ambasadorëve:

Presidenti i Republikës, Sh.T.Z. Ilir Meta, në mbështetje të nenit 92, shkronja “dh”, nenit 93 të Kushtetutës, si dhe të nenit 26, pika 2, të ligjit nr. 23/2015 “Për shërbimin e jashtëm të Republikës së Shqipërisë”, me propozim të Kryeministrit, ka dekretuar, disa lirime të Ambasadorëve të Republikës së Shqipërisë në shtete të tjera dhe organizata ndërkombëtare.

Konkretisht:

–      Zoti Arian Spasse, u lirua nga detyra e Ambasadorit të Jashtëzakonshëm dhe Fuqiplotë të Republikës së Shqipërisë në Republikën e Hungarisë, rezident.

–        Zonja Albana Dautllari, u lirua nga detyra e Ambasadorit të Jashtëzakonshëm dhe Fuqiplotë të Republikës së Shqipërisë në Misionin e Përhershëm të Republikës së Shqipërisë pranë Këshillit të Evropës, në Strasburg, rezident.

–      Zonja Besiana Kadare, u lirua nga detyra e Ambasadorit të Jashtëzakonshëm dhe Fuqiplotë të Republikës së Shqipërisë pranë Organizatës së Kombeve të Bashkuara, në Nju Jork, rezident, dhe ambasador i Jashtëzakonshëm dhe Fuqiplotë i Republikës së Shqipërisë, në Republikën e Kubës, jorezident.

–      Zoti Ferit Hoxha, u lirua nga detyra e Ambasadorit të Jashtëzakonshëm dhe Fuqiplotë të Republikës së Shqipërisë pranë Organizatës së Kombeve të Bashkuara për Edukimin, Shkencën dhe Kulturën (UNESCO), rezident.

 Njoftim i Institucionit të Presidentit të Republikës për emërimet e reja të ambasadorëve

1 tetor 2021

Presidenti i Republikës, Sh.T.Z. Ilir Meta, në mbështetje të nenit 92, shkronja “dh”, nenit 93 të Kushtetutës, si dhe të nenit 26, pika 2, të ligjit nr. 23/2015 “Për shërbimin e jashtëm të Republikës së Shqipërisë”, me propozim të Kryeministrit, si dhe pas administrimit të opinioneve të Komisionit për Politikën e Jashtme për kandidaturat e propozuara, përcjellë nga Kuvendi i Shqipërisë në datën 29.09.2021, ka dekretuar, disa emërime të disa Ambasadorëve të Republikës së Shqipërisë në shtete të tjera dhe organizata ndërkombëtare.

Konkretisht:

–     Zoti Dastid Koreshi u emërua Ambasador i Jashtëzakonshëm dhe Fuqiplotë i Republikës së Shqipërisë në Misionin e Përhershëm të Republikës së Shqipërisë pranë Këshillit të Evropës, në Strasburg, rezident.

–       Zonja Besiana Kadare, u emërua në detyrën e Ambasadorit të Jashtëzakonshëm dhe Fuqiplotë të Republikës së Shqipërisë pranë Organizatës së Kombeve të Bashkuara për Edukimin, Shkencën dhe Kulturën (UNESCO), rezident.

–        Zoti Ferit Hoxha, u emërua Ambasador i Jashtëzakonshëm dhe Fuqiplotë i Republikës së Shqipërisë pranë Organizatës së Kombeve të Bashkuara, në Nju Jork, rezident, dhe Ambasador i Jashtëzakonshëm dhe Fuqiplotë i Republikës së Shqipërisë, në Republikën e Kubës, jorezident.

(r.m).

Comment

*