Rejkjavik, 20 maj 2021 – Diplomatët më të lartë nga administrata e Presidentit Biden dhe nga Rusia, në takimin e tyre të parë, të mërkurën, theksuan se ish-vendet armike të Luftës së Ftohtë kanë dallime serioze në mënyrën se si i shikojnë çështjet botërore, por folën me një ton optimist për bisedimet, duke thënë se të dyja palët gjithsesi mund të gjejnë mënyra për të punuar së bashku.
Sekretari i Shtetit i Shteteve të Bashkuara Antony Blinken, në takimin e tij të parë me Ministrin e Jashtëm rus Sergei Lavrov, një diplomat veteran, tha se “nuk është sekret që kemi mosmarrëveshjet tona” dhe se Uashingtoni do t’u përgjigjej akteve agresive nga Rusia, porse bota do të jetë më e sigurt nëse udhëheqësit e të dy vendeve punojnë së bashku.
Zoti Lavrov, duke folur përmes një përkthyesi, në hapjen e takimit në Rejkjavik, në periferi të një takimi të Këshillit Arktik, tha se Rusia dhe Shtetet e Bashkuara kanë “dallime serioze”, por duhet të bashkëpunojnë “në sfera ku interesat tona afrohen”.
Sekretari Blinken tha se Presidenti Biden dëshiron “marrëdhënie të parashikueshme, të qëndrueshme me Rusinë” dhe tha se të dy vendet mund të punojnë së bashku për të luftuar pandeminë e koronavirusit, për të luftuar ndryshimin e klimës, për programet bërthamore të Iranit e të Koresë së Veriut dhe për luftën në Afganistan.
“Ne mendojmë se kjo është gjë e mirë për njerëzit tanë, e mirë për popullin rus dhe, me të vërtetë, e mirë për botën”, tha Sekretari Blinken.
Takimi i parë mes zyrtarëve të lartë të administratës së Presidentit Biden dhe homologut të tij rus, zgjati një orë e 45 minuta, më shumë se takimi një orësh që pritej.
Sipas mediave shtetërore ruse, z. Lavrov tha se bisedimet ishin “konstruktive” dhe se dy diplomatët do të përgatisin propozime për një takim të mundshëm midis Presidentit amerikan Joe Biden dhe Presidentit rus Vladimir Putin.
Në përmbledhjen e takimit nga zëdhënësi i Departamentit të Shtetit, Ned Price, nuk përmendet samiti i mundshëm presidencial.
Price tha se Sekretari Blinken kërkoi që Rusia të lirojë shtetasit amerikanë Paul Whelan dhe Trevor Reed, ngriti shqetësime rreth dislokimeve ushtarake të Rusisë në Ukrainë dhe përreth, si edhe çështjen e shëndetit të kritikut të ndaluar të Kremlinit Alexei Navalny.
Sekretari Blinken ngriti gjithashtu shqetësimet e Shteteve të Bashkuara për veprimet e Rusisë kundër Zërit të Amerikës dhe Radios Evropa e Lirë / Radio Liria.
Lidhjet kanë qenë të tensionuara që nga marsi kur Presidenti Biden – në fillimin e presidencës së tij – tha se ai e konsideronte Putinin si një “vrasës”, duke bërë që Moska të tërheqë për konsultime ambasadorin e saj në SHBA. I dërguari ende nuk është rikthyer.
Në kohën që pozhvillohej takimi Blinken -Lavrov, Shtetet e Bashkuara vendosën sanksione ndaj disa anijeve dhe subjekteve të përfshira në ndërtimin e tubacionit Nord Stream 2 prej 11 miliardë dollarësh që do të çonte gazin rus nga Arktiku në Gjermani, një marrëveshje që Presidenti Biden e ka kundërshtuar.Megjithatë, administrata e Bidenit vendosi të heqë dorë nga sanksionet ndaj kompanisë që qëndron pas tubacionit dhe ndaj shefit ekzekutiv të saj.
Në komenteve të tij të shkurtra, zoti Lavrov nuk iu përgjigj pyetjeve mbi sanksionet. Para njoftimit, Zëvendës Ministri i Jashtëm rus, Sergei Ryabkov, kishte thënë se heqja dorë nga sanksionet do të ndihmonte në normalizimin e lidhjeve mes Moskës dhe Uashingtonit.
Zoti Lavrov, duke e përmbledhur qëndrimin e Rusisë ndaj Shteteve të Bashkuara, e përshkroi atë si “shumë të thjeshtë”.
“Ne jemi gati të diskutojmë të gjitha çështjet pa përjashtim, por nën perceptimin që diskutimi do të jetë i sinqertë, me faktet në tryezë dhe natyrisht në bazë të respektit të ndërsjellë”.
(Zëri i Amerikës)