Christian Schmidt e merr detyrën e përfaqësuesit të lartë në Bosnjë e Hercegovinë

Sarajevë, 1 gusht 2021 – Gjermani Christian Schmidt e merr detyrën e përfaqësuesit të lartë në Bosnje e Hercegovinë sot, më 1 gusht.

Schmidt e zëvendëson diplomatin austriak Valentin Inzko, i cili shërbeu për 12 vjet si zyrtari më i lartë i Kombeve të Bashkuara në Bosnjë e Hercegovinë, post ky që ka për synim mbrojtjen e të drejtave qytetare, sundimin e ligjit dhe zbatimin e marrëveshjes së paqes të arritur në Dejton, në SHBA, më 1995.

Schmidt, 63-vjeçar, ka reputacionin e një politikani të fortë rajonal dhe federal, i cili nuk ngurron të ndërmarrë vendime kontroverse.

Përfaqësuesi në largim, Inzko, është përballur së fundi me kritikat e Rusisë dhe të Kinës, të cilat muajin e kaluar dështuan të paraqesin një propozim të përbashkët për shuarjen e pozitës së përfaqësuesit të lartë ndërkombëtar në Bosnjë e Hercegovinë.

Zëri më kritik për përfaqësuesin e lartë ndërkombëtar është lideri i entitetit serb të Bosnjës e Hercegovinë, Millorad Dodik.

Bosnja ende qeveriset sipas Marrëveshjes së Dejtonit, e cila çoi në përfundimin e konfliktit ndëretnik në Bosnjë e Hercegovinë, që shpërtheu pas shpërbërjes së federates së Jugosllavisë.

Në Bosnjë e Harcegovinë, përfaqësuesi i lartë ndërkombëtar ka fuqi të imponojnë vendime apo të shkarkojë zyrtarë që pengojnë zbatimin e Marrëveshjes së Dejtonit.

Inzko ka sugjeruar se komuniteti ndërkombëtar “ndryshoi shumë shpejt… nga një prezencë e fortë ndërkombëtare në përgjegjësi të brendshme dhe në institucione të brendshme” në Bosnjë e Hercegovinë.

Javën e kaluar, Inzko tha për AP-në se në të ardhmen “qasja duhet të jetë më e fortë, duhet të ketë një ndjenjë të urgjencës”.

Bosnja e Hercegovina përballet me një varg problemesh që dalin nga strukturat paralele të pushtetit rajonal dhe ekzekutiv.

Dodik nga Republika Sërpska dhe aleatët e tij, më 30 korrik, i miratuan dy ligje të reja, për të bllokuar vendimin e javës së kaluar të Inzkos që ndalon dhe ndëshkon mohimin e gjenocidit në Bosnjë e Hercegovinë.

Inzko ka theksuar se “nuk ka pajtim, pa pranimin e krimeve dhe pa marrë përgjegjësi” për këto krime.

Christian Schmidt u emërua në postin e përfaqësuesit të lartë nga ambasadorët e Bordit Drejtues të Këshillit për Zbatimin e Marrëveshjes së Paqes, organ ndërkombëtar që ende e mbikëqyr procesin e paqes në Bosnjë e Hercegovinë.

(REL) 

Comment

*