Bruksel, 27 gusht 2021 – Delegacionet e Kosovës dhe Serbisë pritet të takohen në Bruksel më 7 dhe 8 shtator, në kuadër të dialogut për normalizimin e marrëdhënieve midis dy vendeve, i cili lehtësohet nga Bashkimi Evropian.
Burimet diplomatike në Bruksel kanë thënë se agjenda e bisedimeve nuk është caktuar ende.
Takimi pritet të jetë në nivel të shefave të ekipeve negociuese. Delegacionin e Kosovës do ta kryesojë zëvendëskryeministri i parë, Besnik Bislimi, ndërsa atë të Serbisë drejtori i Zyrës për Kosovën në Qeverinë e Serbisë, Petar Petkoviq.
I dërguari i posaçëm i BE-së për dialogun, Mirosllav Lajçak, ka biseduar përmes telefonit me të dy kryenegociatorët pikërisht për të përgatitur takimin e tyre të radhës.
“Pata diskutime përmbajtjesore, të ndara, me zëvendëskryeministrin e parë të Kosovës, Besnik Bislimi, dhe me drejtorin e Zyrës së Serbisë për Kosovën, Petar Petkoviq, rreth përgatitjeve për takimin e radhës në nivel të kryenegociatorëve”, ka shkruar Lajçak në Twitter.
Takimi i ekipeve të Kosovës dhe Serbisë pritet të jetë si takim përgatitor për një takim tjetër të kryeministrit të Kosovës, Albin Kurti, dhe presidentit të Serbisë, Aleksandar Vuçiq.
Edhe ky takim pritet të zhvillohet gjatë muajt shtator, por data për të nuk është caktuar ende.
Takimi i fundit në nivel të lartë është zhvilluar më 19 korrik, por ai nuk ka prodhuar asnjë rezultat konkret.
(r.m.)