Cambridge, 10 maj 2022 – Gjuha shqipe nga tash e tutje do të jetë si lëndë zgjedhore për herë të parë në Universitetin e Harvardit, ka njoftuar Faton Limani, i cili punon si administrator në këtë universitet.
Limani, përmes një postimi në Facebook, ka bërë të ditur se lënda e gjuhës shqipe do të përfshihet në programet studimore në tri nivele të studimeve në Departamentin e Letërsisë Krahasuese: njohuri fillestare (elementary), njohuri bazike (intermediary) dhe niveli i avancuar (advanced).
“Sot kam kënaqësinë të ndaj me ju një lajm shumë të gëzueshëm sa i përket gjuhës sonë shqipe. Në bashkëpunim me bashkëkombësen dhe kolegen Eva Stathi – Misho kemi arritur që të fusim lëndën e gjuhës shqipe si lëndë zgjedhore për herë të parë në Universitetin e Harvardit për të gjithë studentët e të gjitha niveleve. Lënda e gjuhës shqipe do të ofrohet gjatë tërë vitit në tre nivele – njohuri fillestare (elementary), njohuri bazike (intermediary) dhe niveli i avancuar (advanced) në Departamentin e Letërsisë Krahasuese”, ka shkruar Limani.
(r.m.)