Prishtinë, 29 mars 2021 – Ambasadori i Shteteve të Bashkuara në Prishtinë, Philip Kosnett ka thënë se zgjedhja e Presidentit të ri është shumë e rëndësishme për përmbylljen e procesit të konstituimit të institucioneve të reja shtetërore të Kosovës.
“Kosnett ka theksuar nevojën për rol konstruktiv të të gjitha forcave politike në vend përgjatë këtij procesi, duke pasur parasysh interesin shtetëror para atij politik e partiak”, thuhet në një njoftim të zyrës së Presidentit të Kosovës, pas takimit të ushtruesit të detyrës së presidentit, Glauk Konjufca, me ambasadorin Kosnett.
Kandidate për postin e presidentit është Vjosa Osmani, e cila në zgjedhjet e 14 shkurtit garoi bashkë më listën për deputetë të Lëvizjes Vetëvendosje duke fituar mbi 300 mijë vota.
Mirëpo, deri më tash nuk dihet ende nëse janë siguruar votat apo edhe kuorumi në kuvend për zgjedhjen e presidentit.
Më 22 mars, u konstituua Kuvendi i ri dhe po të njëjtën ditë u zgjodh edhe Qeveria e re e Kosovës.
Që prej 5 nëntorit, 2020, Kosova është me ushtrues detyre të presidentit, pasi Hashim Thaçi dha dorëheqje nga kjo pozitë pas konfirmimit të aktakuzës për krime lufte dhe krime kundër njerëzimit nga Dhomat e Specializuara në Hagë.
Që nga 5 nëntori deri më 22 mars, këtë post e ushtroi Vjosa Osmani dhe pas zgjedhjes në krye të kuvendit, Glauk Konjufca mori edhe detyrën e ushtrimit të postit të presidentit.
Në njoftim thuhet se Konjufca, gjatë takimit, vuri në pah rëndësinë e bashkëpunimit dhe thellimit edhe të mëtutjeshëm të raporteve ndërmjet të të dy shteteve.
Ai poashtu ka potencuar rëndësinë e stabilitetit institucional dhe konstituimit sa më të shpejtë të të gjitha institucioneve, si parakusht për zhvillim të proceseve me rëndësi për vendin.
(r.m.)