Prishtinë, 12 prill 2021 – Kosova do të sigurojë mbi 100.000 vaksina kundër koronavirusit Pfizer/BioNTech, deri në fund të qershorit.
Lajmi u bë i ditur nga programi COVAX i Organizatës Botërore të Shëndetësisë, i cili synon shpërndarjen e drejtë të vaksinave edhe në vendet në zhvillim.
COVAX publikoi të hënën listen e 146 vendeve të botës, ku janë shpërndarë dhe pritet të shpërndajen vaksina kundër koronavirusit.
Në këtë listë bëhet e ditur se në rundin e tretë të shpërndarjes nga COVAX, i cili e përfshin periudhën prill-qershor 2021, Kosova do të sigurojë 100.620 doza të vaksinës Pfizer/BioNTech.
Kosova, në fund të muajit të kaluar, ka marrë 24.000 doza të vaksinës AstraZeneca, po përmes COVAX-it.
Në listën e publikuar të hënën bëhet e ditur se në rundin e dytë të shpërndarjes nga COVAX, që mbulon periudhën shkurt-maj 2021, Kosova do të sigurojë në total 100,800 vaksina AstraZeneca.
Marrë parasysh 24.000 dozat fillestare, Kosova do të marrë edhe 76.800 vaksina AstraZeneca, deri në fund të muajit të ardhshëm.
Si Pfizer/BioNTech, ashtu edhe AstraZeneca, duhet të jepen në dy doza për të arritur efektin maksimal.
Fushata e vaksinimit në Kosovë ka nisur më 29 mars.
Prioritet në imunizim u është dhënë punonjësve shëndetësorë dhe të moshuarve.
Në Kosovë, deri më 12 prill, janë regjistruar mbi 98,341 raste me koronavirus dhe 1.996 viktima.
Numri aktual i rasteve aktive është 13.763.
(REL)