Kryeministri i Holandës: Për mua, Hungaria s’ka më punë në BE

Bruksel, 24 qershor 2021 – Kryeministri i Holandës, Mark Rutte, e kritikoi ashpër Qeverinë e Hungarisë për miratimin e një ligji të ri kundër komunitetit LGBT.

“Për mua, Hungaria nuk ka më punë në BE”, tha Rutte, duke arritur në një samit të udhëheqësve të BE-së në Bruksel, citojnë agjencitë e lajmeve.

“Por, unë nuk jam i vetmi që e vendos këtë: ka edhe 26 të tjerë [vendet e BE-së]. Kjo duhet të bëhet hap pas hapi”, shtoi Rutte.

Ligji, i cili umiratua bga Parlamenti u Hungarisë më 15 qershor, i ndalon diskutimet dhe shpërndarjen në shkolla të informacioneve që mendohet se promovojnë homoseksualitetin dhe ndërrimin e gjinisë.

Më saktësisht, ligji ua ndalon fëmijëve dhe të rinjve librat, filmat dhe përmbajtjet që flasin për seksualitet tjetër, përveç heteroseksualitetit.

Kryeministri i Hungarisë, Viktor Orban, u tha gazetarëve në Bruksel se ligji i sapomiratuar është keqkuptuar.

“Ai nuk është kundër homoseksualitetit. Bëhet fjalë për të drejtat e fëmijëve dhe të prindërve”, tha Orban.

Çështja u bë lajm në gjithë botën, kur Federata Evropiane e Futbollit (UEFA) e refuzoi një kërkesë të qytetit gjerman të Mynihut që stadiumi i këtqyteti të ndriçohet me ngjyrat e ylberit, në ditën që futbollistët e Hungarisë do të luanin me Gjermaninë, në kuadër të kampionatit Euro 2020.

UEFA tha se çështja është politike, ndërsa ajo vetë është organizatë neutrale në aspektin politik dhe fetar.

(r.m.)

Comment

*