Kur dy avionë u përplasën mbi New York City

(Në fotografi, avioni i kompanisë ajrore United Airlines – Fluturimi 826 – i rrëzuar mbi Brooklyn, në kryqëzimin e Sterling Place dhe 7th Avenue – lagjia Park Slope – në dhjetor 1960.)

Thuhet se të gjithë banorët e Nju Jorkut e mbajnë mend se ku ishin kur morën vesh për tragjedinë e 11 Shtatorit. Për njujorkezët e vitit 1960, incidenti që do ta mbanin mend gjithmonë ishte ai i përplasjes në ajër i dy avionëve. Ngjarja ishte tronditëse dhe mesa duket rasti i parë që dy avionë përplasen mbi një qytet, në SHBA.

Ndodhi në 16 dhjetor 1960, në një mëngjes të karakterizuar nga dëbora e pastaj nga mjegulla e shiu. Avioni që u përplas me këtë në fotografi u rrëzua në Miller Field, në Staten Island. Në total, 128 vetë, udhëtarë dhe ekuipazh në të dy avionet humbën jetën. Përveç tyre u vranë edhe gjashtë vetë që patën fatin e keq t’u binin mbeturinat e avionëve nga sipër.

Një djalë 11-vjeçar, që udhëtonte me një nga avionët, ra nga një e çarë e krijuar pas përplasjes, mbi një pirg me borë dhe arriti të shpëtonte. U duk se kishte ndodhur një mrekulli, por për shkak të flakëve që kishin marrë rrobat pas përplasjes dhe plagët nga rënia, edhe ai vdiq një ditë më vonë. (Ruben Avxhiu)

Comment

*