Beograd, 9 maj 2023 – Një mural i të dënuarit për krime lufte në Bosnje dhe Hercegovinë, gjeneralit serb Ratko Mlladiq, në qendër të Beogradit, u fshi të martën.
Murali ishte i pikturuar në fasadën e një ndërtese banimi në rrugën e Njegoshit, në qendër të Beogradit.
Aktivistët e mbuluan atë me ngjyrë të bardhë.
Një ditë më herët, aktivistët dhe qytetarët u përpoqën ta fshinin muralin me furça çeliku, por aksioni përfundoi me mbulimin e fytyrës së Mlladiqit me një zemër të kuqe, e cila mbeti në murin ku ishte murali.
Në të dyja aksionet mori pjesë edhe Gjorgje Miketiq, deputet i Parlamentit të Serbisë nga partia “Zajedno”.
Miketiq i tha Radios Evropa e Lirë se fshirja e muralit është pjesë e fushatës “Ta çlirojmë Serbinë nga urrejtja”.
“Ne po e bëjmë këtë si qytetarë të zemëruar, sepse ky mural që madhëron kriminelin e luftës – përgjegjës edhe për vdekje të fëmijëve – ndodhet 200 metra larg shkollës ‘Vlladislav Ribnikar’”, tha Miketiq.
Më 3 maj, në këtë shkollë u vranë tetë nxënës dhe një rojë e sigurisë. Autor i këtij akti ishte një nxënës i po kësaj shkolle, 13 vjeçar, bir i një mjeku.
Vetëm një ditë pas këtij sulmi, një sulmues tjetër i armatosur vrau tetë persona dhe plagosi 14 të tjerë në tri fshatra të Mlladenovcit, në afërsi të Beogradit. Autor i këtij krimi ishte një 21 vjeçar, bir i një ushtaraku.
Kush është Mlladiq?
Mlladiq është dënuar nga Tribunali i Hagës me burgim të përjetshëm për gjenocid, krime kundër njerëzimit, shkelje të ligjeve apo zakoneve të luftës, gjatë luftës së viteve 1992-1995 në Bosnje e Hercegovinë.
Muralin kushtuar tij e pikturuan autorë të panjohur në korrik të vitit 2021, në fasadën e një ndërtese banimi në qendër të Beogradit.
Kjo ndodhi një muaj pasi gjykata në Hagë e konfirmoi dënimin e Mlladiqit me burgim të përjetshëm.
Deri më tash, qytetarët kanë hedhur disa herë ngjyrë mbi të.
Komuna e Beogradit, Vraçar, në territorin e së cilës ndodhet ndërtesa me muralin e Mlladiqit, ka njoftuar më 9 dhjetor se, në përputhje me rregulloret, e ka hequr muralin me kërkesë të banorëve të ndërtesës.
Megjithatë, murali është kthyer në gjendjen e tij origjinale në më pak se gjysmë ore.
Dyshohet se autorët e muralit u përkasin grupeve të djathta në Serbi.
(REL)