Në Kosovë, opozita e kritikon ashpër qeverinë për vlerën e koeficientit të pagave në sektorin publik

Prishtinë, 1 shkurt 2023 – Tri partitë opozitare në Kosovë, Partia Demokratike e Kosovës (PDK), Lidhja Demokratike e Kosovës (LDK), dhe Aleanca për Ardhmërinë e Kosovës (AAK), e kanë lëshuar sallën e Kuvendit në shenjë pakënaqësie me vlerën e koeficientit të pagave në sektorin public, të përcaktuar nga Qeveria e Kosovës.

Qeveria e Kosovës vendosi sot që vlera e koeficientit të pagave për vitin 2023 të jetë 105 euro.

Pagat e punëtorëve të sektorit public në Kosovë llogariten duke e shumëzuar koeficientin e pagës së një pozite me vlerën monetare të koeficientit. Raporti i koeficienteve është nga 1 me 18.

Kreu i Grupit Parlamentar të PDK-së, Abelard Tahiri, tha se partia e tij është e zhgënjyer me vlerën e koeficientit dhe e quajti atë “koeficient të mjerimit”. Sipas tij kjo vlerë e koeficientit e thellon më shumë varfërinë në Kosovë.

“Ky koeficient i demotivon të rinjtë e të rejat që duan të jenë pjesë e administratës”, tha ai.

Ndërsa shefi i Grupit Parlamentar të LDK-së, Arben Gashi, tha se koeficienti i pagave nuk e adreson as për së afërmi çështjen e inflacionit.

“Koeficienti i pagave as për së afërmi nuk adreson çështjen e inflacionit që ndodhi këto dy vjet, ku jeta e qytetarëve të varfër të Kosovës është bërë ferr”, tha ai.

Ndërsa deputetja e AAK-së, Time Kadrijaj, Qeverinë Kurti e quajti “qeveri të mashtrimeve”.

“Nuk po mendoni për qytetarët”, tha ajo, duke shtuar se është dashur që për këtëçështje të ketë diskutim public dhe vldera e koeficientit të mbahet e fshehtë.

“Në këtë gjendje ekonomike dhe sociale nuk ju ndihmoni qytetarëve”, ka deklaruar Kadrijaj.

Shefja e Grupit Parlamentar të Vetëvendosjes, Mimoza Kusari – Lila, tha se Qeveria “ka bërë punë të jashtëzakonshme” me miratimin e Ligjit të pagave dhe caktimin e koeficientit”. Ajo tha se me këtë Ligj mundësohet trajtim i barabartë i punonjësve të sektorit publik dhe se koeficienti prej 105 eurosh “është bazë, pa llogaritur shtesat”.

Pasi deputetët e opozitës e lëshuan sallën, seanca e Kuvendit u ndërpre për shkak të mungesës së kuorumit.

Ligji i ri i pagave në Kosovë do të hyjë në fuqi më 5 shkurt të këtij viti.

Ligji, i cili është miratuar në dhjetor të vitit të kaluar, nuk e përcakton vlerën e koeficientit, por e përcakton një tavan deri ku mund të paguhet një punonjës i shtetit.

Vlera e koeficientit që u përcaktua sot nga Qeveria e Kosovës nuk do të jetë e pandryshueshme. Nga janari i vitit të ardhshëm vlera e koeficientit do të jetë 110 euro.

Sektori publik në Kosovë ikarreth 83 mijë punonjës.

(r.m.