Nikolla: Instituti Kombëtar Demokrat Amerikan, partner strategjik i Kuvendit

Kryekuvendarja Lindita Nikolla priti Presidentin e Institutit Kombëtar Demokrat Amerikan (NDI), Ambasadorin Derek Mitchell dhe Drejtorin Rajonal për Europën Lindore dhe Juglindore, Robert Benjamin

Knid Ndrenika

Kryetarja Lindita Nikolla tha në Tiranë se opozita në Kuvendin e Shqipërisë, dialogu politik dhe kuvendar konstruktiv, si dhe një Kuvend i hapur dhe transparent dhe pjesëmarrja qytetare janë thelbësore për demokracinë.

Zonja Nikolla foli në takimin me Presidentin e Institutit Kombëtar Demokrat Amerikan (NDI), Ambasadorin Derek Mitchell dhe Drejtorin Rajonal për Europën Lindore dhe Juglindore, Robert Benjamin.

Kryetarja Nikolla shtoi se NDI është partner strategjik i Kuvendit të Shqipërisë, në përpjekjet e përbashkëta për të ngritur e forcuar kapacitetet ligjvënëse.

Po ashtu zonja Nikolla theksoi se këto përpjekje dhe kapacitete përfaqësuese dhe mbikëqyrëse kanë rëndësi për zhvillimin e demokracisë dhe konsolidimin e institucioneve.

Biseda u përqendrua mbi aspektet e konsolidimit të institucioneve demokratike, rritjen e pjesëmarrjes qytetare, veçanërisht të rinisë si dhe fuqizimin e rolit të grave në politikë e vendimmarrje.

Presidenti Mitchell dhe zoti Benjamin vlerësuan rolin dhe përpjekjet e Kuvendit për ndërtimin e klimës pozitive e dialogut konstruktiv.

Zytarët e NDI-së garantuan mbështetjen e tyre për nxitjen e dialogut politik dhe Kuvendar, demokratizimin e partive politike, fuqizimin e institucioneve demokratike dhe modernizimin e shërbimeve parlamentare.