Kryetarja e Kuvendit të Shqipërisë, Lindita Nikolla, tha gjatë konferencës për shtyp me homologun e saj në Kosovë, Glauk Konjufca, gjatë vizitës zyrtare në vendin fqinj, se kjo është vizita e saj e parë jo vetëm jashtë Shqipërisë, por edhe jashtë Tiranës.
Në fjalën e saj, kryeparlamentarja shqiptare theksoi se dy qeveritë shqiptare e kosovare duhet të bashkëpunojnë me njëra-tjetrën, në mënyrë që rezultatet të jenë më të prekshme.
“Jam e lumtur që jam sot në Kosovë dhe që pata nderin të bashkëbisedoj me ju. Kjo është vizita ime e parë jo vetëm jashtë Shqipërisë, por edhe jashtë Tiranës, sepse nuk kam vizituar ende një qytet tjetër të Shqipërisë. Ndaj është moment emocional tejet i veçantë që të jem sot në Kosovë dhe të takoj vëllanë tim, Glauk Konjufca.
Ne kemi marrë përsipër t’iu shërbejmë shqiptarëve në Kosovë e Shqipëri dhe për të pasur sa më shumë rezultate, duhet të kemi bashkëpunimin me njëri-tjetrin. Kjo është një vizitë që tregon se nuk kemi më kohë për të humbur, por duhet të fillojmë bashkërendimin, që rezultatet të jenë më të prekshme.
Ne inkurajojmë mbledhjet e përbashkëta të dy qeverive. Ngritja e Komitetit të Përbashkët për ta parë si po shkojnë marrëveshjet dhe dakordësimet, që dy qeveritë tona po bëjnë, do të ketë edhe përfaqësues të dy parlamenteve tona”, tha Nikolla.
Kryeministri i Kosovës, Albin Kurti po pret në takim kryetaren e Kuvendit të Shqipërisë, Lindita Nikolla.
Nga ky takim mediet lejohen të marrin pamje vetëm në oborrin e ndërtesës së qeverisë.
Lindita Nikolla u zgjodh kryetare e Kuvendit të Shqipërisë më 10 shtator. Kjo është vizita e parë zyrtare e saj në Kosovë, pas marrjes së detyrës.
Në mëngjes ajo është takuar edhe me kryetarin e Kuvendit të Kosovës, Glauk Konjufcën.