Munih, 18 shkurt 2022 – Presidentja e Kosovës, Vjosa Osmani, kryeministri Albin Kurti dhe ministrja e Punëve të Jashtme dhe Diasporës, Donika Gërvalla, janë takuar me kryeministrin e Greqisë, Kyriakos Mitsotakis, në margjina të Konferencës së Sigurisë në Mynih (MSC).
Kryeministri Kurti, në një postim në Twitter, ka shkruar se në takim kanë kërkuar që Greqia ta njohë shtetin e Kosovës.
“Greqia është një faktor shumë i rëndësishëm për rajonin tonë, NATO-n dhe BE-në. Me presidenten Osmani, ministren Gërvalla takova kryeministrin grek Kyriakos Mitsotakis. Ne ndajmë vlera, synime dhe interesa të përbashkëta ekonomike dhe ritheksuam nevojën për njohjen e pavarësisë së Kosovës”, ka shkruar Kurti.
Greece is a very important factor for our region, NATO & the EU.
— Albin Kurti (@albinkurti) February 18, 2022
W/ Pres. @VjosaOsmaniPRKS, MFA @gervallaschwarz I met Greek PM, Kyriakos Mitsotakis. We share common values, goals and economic interests and reiterated the need for recognition of Kosova’s independence.
#MSC2022 pic.twitter.com/EYoAZpxFjK
Kabineti i Presidentes Osmani ka njoftuar se në takim është kërkuar përkrahja e Greqisë për liberalizimin e vizave për qytetarët e Kosovës dhe është theksuar se ky proces nuk duhet të ndërlidhet me procese të tjera. Aty është theksuar se Kosova mbetet e palëkundur në orientimin euro-atlantik dhe në synimin për anëtarësim në NATO, në OKB dhe në organizatat tjera ndërkombëtare.
Në njoftim thuhet se në takim me kryeministrin grek është diskutuar edhe për thellimin e bashkëpunimit mes Kosovës dhe Greqisë në fushën e sigurisë, të tregtisë, të kulturës dhe në fusha të tjera me interes të dyanshëm.
(r.m.)