Presidenti Meta e uron Presidenten Vjosa Osmani

Tiranë, 4 prill 2021 – Presidenti i Republikës së Shqipërisë, Ilir Meta, e ka uruar Presidenten e sapozgjedhur të Republikës së Kosovës, Vjosa Osmani.

Në mesazhin e urimit, të përcjellë përmes rrjetit social “Facebook”, Meta ka shprehur bindjen se zonja Osmani do t’i shërbejë me përkushtim dhe përgjegjshmëri të lartë unitetit, frymës së konsensusit dhe dialogut në Kosovë, si edhe forcimit të bashkëpunimit ndërinstitucional dhe marrëdhënieve të shkëlqyera vëllazërore mes Kosovës e Shqipërisë.

Postimi i plotë i Metës:

Urimet më të sinqerta Vjosa Osmanit me rastin e zgjedhjes në detyrën tepër të rëndësishme të Presidentes së Republikës së Kosovës.

Jam i bindur se Presidentja Osmani, në përputhje me Kushtetutën e Kosovës, do t’i shërbejë me përkushtim dhe përgjegjshmëri të lartë unitetit mes të gjithë qytetarëve, frymës së konsensusit, dialogut, forcimit të bashkëpunimit ndërinstitucional dhe marrëdhënieve të shkëlqyera vëllazërore mes dy vendeve tona.

Si President i Republikës së Shqipërisë shpreh gatishmërinë time të plotë për bashkëpunim të ngushtë për thellimin e mëtejshëm të marrëdhënieve politike, ekonomike dhe kulturore, në interes të qytetarëve tanë dhe përshpejtimit të proceseve të integrimit në Bashkimin Europian, të Shqipërisë dhe të Kosovës. 🇦🇱❤🇽🇰

(r.m.)

Comment

*