Tiranë, 4 korrik 2021 – Presidenti i Shqipërisë, lir Meta, ia ka uruar Presidentit të SHBA-së, Joe Biden, 4 Korrikun – Ditën e Pavarësisë së Amerikës.
Në urimin e tij, Presidenti Meta ka shprehur besimin se madhështia e SHBA-së dhe aleatëve të saj do të triumfojë ndaj sfidave të shumta të kohës.
“Jemi optimistë, që madhështia e Shteteve të Bashkuara të Amerikës, si edhe e aleatëve të saj, e mbështetur në vlerat tona të përbashkëta euro-atlantike si dhe demokratike, do të mbizotërojë dhe do të triumfojë mbi shumë sfida të kohëve tona”, ka thënë ai.
Meta ka shprehur vendosmërinë e Shqipërisë për të qëndruar në krah të Amerikës dhe për të zhviilluar e thelluar lidhjet midis dy shteteve.
“Do të dëshiroja të shfrytëzoja këtë rast që t’Ju ritheksoja vendosmërinë e Shqipërisë për të qëndruar krah për krah Shteteve të Bashkuara të Amerikës në të mirë të interesit të përbashkët të dy popujve tanë miq, si dhe për të zhvilluar akoma edhe më tej lidhjet tona strategjike”, ka theksuar Presidenti Meta!
Presidenti Meta u është drejtuar me të njëjtin mesazh edhe shqiptaro-amerikanëve që kanë kontribuar në mënyrë thelbësore për forcimin e marrëdhënieve mes Shqipërisë dhe SHBA-së.
Ai ka theksuar besimin se miqësia mes Shqipërisë dhe SHBA-së do të forcohet akoma më shumë.
Urimi i Presidentit Meta:
I nderuari President, Sh.T.Z Joseph R. Biden Jr.,
245-vjetori i Ditës së Pavarësisë së Shteteve të Bashkuara të Amerikës më jep kënaqësinë e veçantë që t’Ju përcjell, edhe në emër të popullit shqiptar, urimet më të ngrohta e të përzemërta për Ju dhe popullin e madh amerikan, që e bënë këtë komb kaq të fortë dhe të begatë.
I njëjti mesazh urimi u shkon edhe të gjithë shqiptaro-amerikanëve, të cilët kanë kontribuar në mënyrë thelbësore për forcimin e marrëdhënieve tona. Ne ndihemi krenarë për bashkëkombasit tanë, ashtu siç jam i sigurt se ndiheni edhe Ju, si dhe besoj se miqësia jonë e përbashkët e me rrënjë të thella, do të forcohet akoma edhe më tepër.
Jemi optimistë, që madhështia e Shteteve të Bashkuara të Amerikës, si edhe e aleatëve të saj, e mbështetur në vlerat tona të përbashkëta euro-atlantike si dhe demokratike, do të mbizotërojë dhe do të triumfojë mbi shumë sfida të kohëve tona, përfshirë edhe pandeminë e COVID-19. Ju jemi mirënjohës për ndihmesën dhe mbështetjen bujare, që na dha qeveria juaj, për t’u përballur me këtë pandemi, si dhe me sfida të tjera, gjithashtu.
Do të dëshiroja të shfrytëzoja këtë rast që t’Ju ritheksoja vendosmërinë e Shqipërisë për të qëndruar krah për krah Shteteve të Bashkuara të Amerikës në të mirë të interesit të përbashkët të dy popujve tanë miq, si dhe për të zhvilluar akoma edhe më tej lidhjet tona strategjike!
Ju lutem Zoti President, krahas urimeve të mia më të mira për shëndetin dhe lumturinë tuaj, të pranoni shprehjen e konsideratës sime më të lartë!
(r.m.)