Seul, 29 tetor 2022 – Të paktën 120 persona e humbën jetën dhe 100 të tjerë u plagosën në një rrëmujë që ndodhi gjatë festimit të Halloween, të shtunën në mbrëmje, në Seul, njoftuan autoritetet koreano-jugore.
Reuters raportoi se disa nga të plagosurit janë në gjendje kritike, prandaj dyshohet se numri i viktimave nuk është përfundimtar.
Sipas zyrtarëve koreano-jugor, aksidenti ndodhi kur njerëzit u shtypën për vdekje në një turmë të madhe në një rrugicë të ngushtë, në zonën Itaewon. Agjencia koreano-jugore e lajmeve Yonhap raportoi se rreth 50 persona pësuan arrest kardiak.
Në pamjet nga vendi i ngjarjes shihen çanta krahu në rrugë, punonjës mjekësorë që përpiqen të mbajnë në jetë njerëzit e lënduar dhe shpëtimtarët që përpiqen të nxjerrin njerëzit e bllokuar nën të tjerët, raportoi BBC.
Choi Cheon-sik, zyrtar i Agjencisë Kombëtare të Zjarrfikësve të Koresë së Jugut, tha se rrëmuja besohet të ketë ndodhur kur turma u shty përpara në një rrugicë të ngushtë pranë hotelit Hamilton. Kjo zonë është vendi kryesor i festës në Seul.
Disa media lokale raportuan se rrëmuja ndodhi kur një numër i madh njerëzish nxituan të hyjnë në një bar në Itaewon, pasi dëgjuan se aty ndodhej një personazh i famshëm.
#SouthKorea: About 81 people have been receiving CPR after suffering from cardiac arrest in #Seoul's #Itaewon area due to overcrowding during the #Halloween festivities in Itaewon, a popular nightlife district in Seoul. pic.twitter.com/dgyGmFYaNb
— Wᵒˡᵛᵉʳᶤᶰᵉ Uᵖᵈᵃᵗᵉˢ𖤐 (@W0lverineupdate) October 29, 2022
Më shumë se 400 punonjës të urgjencës nga gjithë vendi u dërguan në Seul për të ndihmuar në trajtimin e të plagosurve.
Presidenti i Koresë së Jugut, Yoon Suk-yeol, bëri thirrje që të lënduarit të trajtohen shpejt dhe u kërkoi zyrtarëve të rishikojnë protokollet e sigurisë në vendgumbullimet për festimin e Halloween-it.
Presidenti urdhëroi Ministrinë e Shëndetësisë të punësojë ekipe të ndihmës mjekësore për situata emergjente dhe të sigurojë shtretër në spitale për të lënduarit.
Kryebashkiaku i Seulit, Oh Se-hoon, i cili ndodhet në një vizitë zyrtare në Evropë, e ka anuluar pjesën tjetër të udhëtimit të tij, për t’u kthyer në Seul sa më parë.
(r.m.)