Nion, 25 shkurt 2022 – UEFA njoftoi të premten se ka marrë vendim që ndeshja finale e Ligës së Kampionëve që ishte planifikuar të zhvillohej në Shën Petersburg të Rusisë të zhvillohet në Paris.
Ndërkaq ndeshjet e klubeve dhe ekipeve kombëtare të Ukrainës dhe të Rusisë do të zhvillohen në vende neutral.
Këto vendime janë marrë pas agfresionit të Rusisë ndaj Ukrainës.
Organizata europiane e futbollit njoftoi se do të “mbështesë plotësisht përpjekjet shumëpalëshe për të miratuar një klauzolë për të shpëtuar futbollistët dhe familjet e tyre në Ukrainë që përballen me vuajtje të tmerrshme njerëzore dhe zhvendosje.”
UEFA e falënderoi presidentin francez, Emmanuel Macron, për “mbështetjen dhe angazhimin e tij personal” për çështjen e ndeshjes finale.
Zëdhënësi i Kremlinit, Dmitry Peskov, në një konferencë telefonike me gazetarë e cilësoi sit ë turpshëm vendimin e UEFA-s për finalen e Ligës së Kampionëve.
“Është e turpshme që është marrë një vendim i tillë. Shën Petersburgu mund të kishte ofruar të gjitha kushtet e favorshme për ndeshjen finale”, ka thënë ai, transmeton Zëri i Amerikës.
Sekretarja e Kulturës e Mbretërisë së Bashkuar, Nadine Dorries, e cila është përgjegjëse për sportin, e mbështeti vendimin e UEFA-s.
“E mirëpres veprimin e vendosur të UEFA-s për t’ia hequr Shën Petersburgut të drejtën e organizimit të finales së Ligës së Kampionëve të këtij viti. Rusia nuk duhet të lejohet t’i shfrytëzojë ngjarjet sportive dhe kulturore në skenën botërore për të legjitimuar sulmin e saj të paprovokuar, të paramenduar dhe të panevojshëm kundër një shteti sovran demokratik”, tha ajo.
Stadiumi i Shën Petersburgut njihet si Stadiumi “Gazprom”, pasi ka një marrëveshje sponsorizimi me kompaninë shtetërore ruse të energjisë, e cila sponsorizon gjithashtu Ligën e Kampionëve dhe Kampionatin Evropian të Futbollit “Euro 2024”.
Një grup ligjvënësish evropianë i kishin kërkuar UEFA-s të enjten të ndryshonte vendin e ndeshjes finale të Ligës së Kampioneve dhe qytetet ruse të mos konsiderojë më për garat e mëdha ndërkombëtare të futbollit.
Ligjvënësit i kërkuan gjithashtu UEFA-s që të ndalojë sponsorizimin e Ligës së Kampionëve nga “Gazpromi”.
(r.m.)