Kiev, 8 prill 2022 – Presidentja e Komisionit Evropian, Ursula von der Leyen, tha të premten se vrasjet e civilëve në qytetin ukrainas të Buças e treguan “fytyrën mizore” të ushtrisë së presidentit rus Vladimir Putin dhe premtoi se Bashkimi Evropian do ta mbështesë Kievin për mbrojtjen e asaj qëajo e quajti “kufiri i Evropës”.
Zonja von der Leyen e vizitoi qytetin e Buçës dhe pa disa nga dëshmitë e krimeve monstruoze të kryera ndaj popullsisë civile, të cilat po cilësohen si dëshmi të gjenocidit rus në Ukrainë.
Ursula von der Leyen e vizitoi Ukrainën së bashku me përfaqësuesin e lartë të Bashkimit Evropian për Politikë të Jashtme e Çështje të sigurisë, Josep Borrell.
Ata u takuan në Kiev me presidentin e Ukrainës Volodymyr Zelensky, të cilit I premtuan mbështetje dhe siguri lidhur me kërkesën e tij për anëtarësimin e Ukrainës në Bashkimin Evropian.
Dy zyrtarwt e Bashkimit Evropian udhwtuan me tren nga kufiri i Ukainws me Poloninw deri nw kryqytetin ukrainas, Kiev. Zonja Von der Leyen u tha gazetarëve se presidenti Zelensky po i përcillej mesazhi i qartë se Ukraina është “në rrugën drejt BE-së”.
“Zakonisht duhen vite përpara se Këshilli i BE-së të pranojë një aplikim për anëtarësim, por Ukraina e bëri këtë brenda një ose dy javësh dhe unë dua që të ecim përpara sa më shpejt të jetë e mundur”, tha ajo.
“Qëllimi ynë është të paraqesim kërkesën e Ukrainës në këshill këtë verë”, tha zonja Van der Leyen.
Ndwrkaq, kryediplomati i BE-së, Joseph Borrell, u tha gazetarëve se kjo vizitw e tyre ishte një sinjal se Ukraina “e ka nën kontroll territorin e saj” dhe se vendin vazhdon të drejtojë qeveria legjitime e Ukrainës.
“Ukraina nuk është një vend i pushtuar, i dominuar. Ka ende një qeveri që pret njerëz nga jashtë vendit dhe ende mund të udhëtohet në Kiev,” tha zoti Borrell.
(r.m.)