Ushtritë më të vogla të botës dhe një koment për Kosovën

Një grafik që tregon ushtritë më të vogla në botë dhe numrat përkatës të ushtarëve.

Kosova, vendi me ushtrinë më të re, me vetëm 2,500 ushtarë ka një nga ushtritë e vogla te Europës.

Aty është edhe një listë me 23 vendet e vetme të botës që nuk kanë fare ushtri.

Sigurisht në epokën moderne ka dy dallime të mëdha. Forca e një ushtrie nuk përcaktohet edhe aq nga numri i ushtarëve, sesa nga teknologjia luftarake dhe përgatitja profesioniste. Dhe dallimi i dytë, mbrojtja po bëhet gjithnjë e më shumë një koncept kolektiv. Shumica e vendeve të vogla më shumë se në armët e tyre besojnë në aleancat ku marrin pjesë, në miqësitë dhe përputhjen e interesave me vende më të mëdha, në organizatat ndërkombëtare, si dhe në një interes të përgjithshëm mbizotërues për ruajtjen e paqes në rajonet e tyre e në botë.

Rasti i Kosovës nuk është përjashtim. Krijimi i ushtrisë, ndonëse një ngjarje e madhe kombëtare, ka vlerë më të madhe simbolike politike, sesa praktike në fushëbetejë.

Duke shpresuar që të mos vijë dita për t’u vënë në provë, mbrojtja e kufijve të Kosovës sigurohet sot, pothuajse në mënyrë ekskluzive nga KFOR-i, një forcë paqeruajtëse që merr fuqinë nga NATO. Në mungesë të NATO-s, problem real i Serbisë, nuk do të ishte pushtimi i Kosovës. Ajo ka ushtri shumë më të fortë dhe më të madhe. Problemi për Serbinë do të ishte ai i përjetshmi, aftësia për ta mbajtur Kosovën në pushtim. Do të ishte tepër e kushtueshme jo vetëm fizikisht, financiarisht, diplomatikisht po me pasoja të rënda për vetë demokracinë dhe lirinë e shoqërisë serbe. Vetëm një regjim i natyrës militariste-fashiste si ai i Millosheviqit mund të detyrojë një shoqëri që burimet e saj të jetesës t’i shpenzojë jo për të mirën e saj po për hir të mbajtjes zap të një populli tjetër. Mitologjia është biznes i shtrenjtë në shekullin 21. Kosova, gjoja “djepi i Serbisë”, do të përfundonte në arkivol të të ardhmes së saj. (Ruben Avxhiu)