Vazhdojnë protestat në veri të Kosovës, shtohet trysnia ndërkombëtare për zgjidhjen e situatës

Prishtinë, 2 qershor 2023 – Në veri të Kosovës po vazhdojnë protestat e grupeve të qytetarëve serbë që u mblodhën sërish të premten para ndërtesave të komunave veriore të Kosovës, që po ruhen nga forcat paqeruajtëse të NATO-s, ndërsa janë shtuar përpjekjet perëndimore për uljen e tensioneve.

Udhëheqësit e Francës dhe Gjermanisë u kërkuan udhëheqësve të Kosovës dhe Serbisë që të pajtohen për mbajtjen e zgjedhjeve të reja komunale në veri të Kosovës, me shpresën se ato do të ulnin tensionet që çuan në protesta të dhunshme në fillim të kësaj jave.

Janë tri kërkesa të qarta, tha shefi i politikës së Jashtme të Bashkimit Evropian, Josep Borrell i cili mori pjesë në një takim të përbashkët me presidenten e Kosovës Vjosa Osmani dhe presidentin e Serbisë Aleksandar Vuçiç në Moldavi.

“Zgjedhje të reja tani, të sigurohet pjesëmarrja e serbëve të Kosovës në procesin zgjedhor dhe të fillojë puna për themelimin e Asociacionit të komunave me shumicë serbe. Dështimi për ta bërë këtë, do të ketë pasoja të rënda për marrëdhëniet tona”, shkroi zoti Borrell.

Presidentja Osmani tha se “Kosova është gati për të mbajtur zgjedhje të reja në veri nëse zhvillohen përmes procesit ligjor”.

Tensionet pasuan zgjedhjet e 23 prillit, të cilat u bojkotuan nga partitë serbe. Kryetarë komunash u zgjodhën kandidatët e partive shqiptare dhe dërgimi i tyre në zyrat komunale nxiti reagimin e palës serbe që u hodh në protesta. Të hënën protestuesit u përplasën me forcat paqeruajtëse të NATO-s. Përplasjet lanë pas vetes 30 ushtarë të plagosur dhe nxitën shqetësimin për ripërtëritje të konfliktit në rajonin e trazuar.

Kryetari i komunës së Leposaviqit, Lulzim Hetemi, që nga e hëna është në zyrën e tij, pa dalë asnjëherë. Ndërkaq kryetarët e komunave të Zveçanit dhe Zubin Potokut, nuk janë në zyrat e tyre.

NATO-ja vendosi dërgimin e 700 trupa shtesë në Kosovë dhe paralajmëroi se më shumë forca mund të dërgohen nëse është e nevojshme.

Sekretari amerikan i Shtetit, Antony Blinken, i bëri thirrje Kosovës dhe Serbisë që të “ndërmarrin hapa të menjëhershëm për të ulur tensionet” dhe të punojnë për normalizimin e marrëdhënieve.

“Ne e mbështesim procesin e integrimit euroatlantik për Kosovën dhe Serbinë. Por, përshkallëzimi aktual më shumë i pengon sesa i ndihmon përpjekjet për të ecur në atë drejtim”, tha sekretari Blinken.

Diplomatët perëndimorë e kanë bërë të qartë se integrimet varen nga normalizimi i marrëdhënieve ndërmjet të dyja vendeve, që u pajtuan në shkurt në Bruksel dhe me 18 mars në Ohër, për një marrëveshje normalizimi, por kjo nuk ndihmoi në uljen e tensioneve.

(Zëri i Amerikës)