Uashington, 23 mars 2022 – Ish-sekretarja amerikane e Shtetit, Madeleine Albright, ka vdekur të mërkurën, në moshën 84-vjeçare.
Ajo vdiq nga kanceri, u bë e ditur në një njoftim të publikuar nga familja Albright në rrjetin social Twitter.
“Ajo ishte e rrethuar nga familjarët dhe miqtë”, u tha në deklaratën e familjes Albright.
Madeleine Albright ishte gruaja e parë e zgjedhur në këtë post më 1997. Në këtë post shërbeu deri në vitin 2001.
Albright ka qenë në Sekretare e Shtetit në kohën kur janë kryer sulmet e NATO-s mbi caqet serbe, që kanë çuar në çlirimin e Kosovës.
Albright e vizitoi Kosovën një muaj pas përfundimit të luftës së vitit 1999 në Kosovë.
“Duke u ngritur kundër [ish-liderit serb, Sllobodan]Millosheviqit, i kemi ulur gjasat për një vullnet të ri të Millosheviqit. Duke ndërtuar paqen në Kosovë, ne do të ndihmojmë në stabilizimin e Ballkanit dhe në këtë mënyrë do të kontribuojmë në një Evropë të tërë dhe të lirë”, ka thënë atëbotë Albright.
Për kontributin e saj për pavarësinë e Kosovës ajo ishte dekoruar me Medaljen e Lirisë nga Presidenti i Kosovës, Ibrahim Rugova.
Në vitin 2019, në 20 vjetorin e hyrjes së trupave të NATO-s, në Prishtinë u zbulua busti i saj. Zonja Albright mori pjesë personalisht në ceremoninë e zbulimit të bustit të saj.
(REL)