Nju Jork, 27 prill 2022 – Ministrja e Jashtme e Shqipërisë, Olta Xhaçka, ka deklaruar se bota duhet të dënojë atë që po ndodh në Ukrainë.
Në mbledhjen e Grupit të Miqësisë për Llogaridhënie për krimet në Ukrainë të OKB-së, të themeluar nga Franca dhe Shqipëria, ajo ka thënë se është shumë e rëndësishme që bota të mësojë atë që po ndodh në Ukrainë.
Xhaçka i ka shprehur mirënjohje Prokurores së Përgjithshme të Ukrainës, e cila, siç tha ajo, “i ka dokumentuar mbi 8 mijë raste të krimeve të kryera nga ushtria ruse në Ukrainë”
“Unë vij nga Ballkani Perëndimor, një rajon që deri më 24 shkurt 2022 cilësohej si teatri i luftës së fundit në Evropë. Skenat e gjakderdhjes dhe shkatërrimit që ne shohim në pamjet që vijnë nga Ukraina godasin shumë më ndryshe dikënd për të cilin lufta dhe krimet e luftës nuk janë gjëra për të cilat lexoni në librat e historisë, por kujtime nga disa dekada më parë”, ka thënë Xhaçka.
Xhaçka ka thënë se ajo çfarë po ndodh sot në Ukrainë e kthen në kujtesë atë që ka ndodhur në Kosovë në vitin 1999.
“Në vitin 1999, vendi im, familja ime, strehoi familje që kishin ikur nga lufta brutale dhe nga fushata e spastrimit etnik në Kosovë. Thellë në memorien time nga ajo kohë ka mbetur ajo ndjenja e pafuqisë për të ndaluar atë që po ndodhte, duke besuar fort se kushdo që po i kryente ato krime të tmerrshme duhej të paguante. Kjo ndjenjë u rizgjua tek unë dhe tek shumë njerëz në Shqipëri dhe në mbarë botën, kur nga Ukraina u shfaqën imazhet e tmerrshme, ku krime të tilla po kryheshin para syve tanë kundër njerëzve të pafajshëm, në një vend që nuk kishte bërë asgjë për të provokuar sulmin kundër tij”, ka theksuar Xhaçka.
Ajo ka thënë se kujtimet e dhimbshme të vitit 1999 nga Kosova e shtynë Shqipërinë të të bëhet një nga themelueset e Grupit të Miqësisë për Llogaridhënie.
“Natyrisht, jo vetëm për shkak të historisë së fundit të Ballkanit Perëndimor, Shqipëria u bë një nga 48 vendet që ia referuan situatën në Ukrainë Prokurorit të Përgjithshëm të GJNP-së vetëm pak ditë pas fillimit të konfliktit. Dhe kjo nuk ndodhi për shkak të kujtimeve të dhimbshme të viteve 1990, që Shqipëria të bëhej një nga themeluesit e këtij Grupi Miqësie për Llogaridhënie. E bëmë sepse besojmë se bota ka detyrimin të bëjë më të mirën për t’i ofruar drejtësi popullit ukrainas. E bëmë sepse pavarësisht përsëritjeve të dhimbshme të situatave të tilla tragjike në historinë tonë të fundit, bota ende nuk ka një mënyrë më të mirë, më efikase për të siguruar që krime të tilla të mos ndodhin më, ku shkaktarët duhet të mbajnë përgjegjësi”, ka thënë Xhaçka.
“Por, ka edhe një arsye tjetër pse ne e bëmë atë, e cila është veçanërisht prekëse në rastin e luftës së paligjshme të agresionit rus kundër Ukrainës. Sepse Rusia është një anëtare e përhershme e Këshillit të Sigurimit të OKB-së, një vend që supozohet të jetë një nga mbrojtësit e sistemit të bazuar në rregulla ndërkombëtare dhe për këtë arsye është e pajisur me të drejtën e vetos, por papritmas u kthye në mashtruese”, ka theksuar ajo.
“Një i ashtuquajtur mbrojtës i sistemit, ka nisur një luftë kundër një fqinji, duke kryer krime të paimagjinueshme në këtë proces, pse? Jo sepse u sulmua, jo sepse u kërcënua, por sepse zgjodhi. Ajo nuk është ndalur, edhe kur Asambleja e Përgjithshme e kësaj Organizate e dënoi në masë luftën e saj duke I kërkuar ta ndalonte atë”, është shprehur Xhaçka.
“Në çfarë bote do të jetonim nëse nuk bashkohemi përballë kësaj? Çfarë lloj mesazhi do t’i dërgonim çdo diktatori aspirant dhe çdo regjimi që për arsye zgjedhjeje vendos se nuk është i kënaqur me kufijtë, me hapësirën gjeopolitike apo me burimet e tij?”, është shprehur ajo.
“Është gjithashtu për këtë arsye pse Rusia duhet të mbajë përgjegjësi. Dhe kjo është diçka që i detyrohemi edhe popullit ukrainas, të cilët në këtë luftë po luftojnë jo vetëm për tokën dhe vendin e tyre, por edhe për ne, për paqen, sigurinë dhe stabilitetin dhe për të ardhmen e të gjithëve ne”, ka thënë Xhaçka.
“Llogaridhënia ka të bëjë me mbrojtjen e themeleve të sistemit tonë, parimeve të Kartës së OKB-së, vlerave tona të përbashkëta dhe përgjegjësisë sonë të përbashkët. Ne nuk mund ta parandalonim këtë konflikt, por nuk duhet të dështojmë që përgjegjësit të japin llogari”, ka theksuar ministrja e jashtme e Shqipërisë, Olta Xhaçka.
(Sipas ATSH)