Nga Avokati Kieran Both
Vitet e fundit, Shërbimi i Nënshtetësisë dhe Emigracionit të SHBA-së (USCIS) e ka bërë të detyrueshme kërkesën për takime në “InfoPass” për këdo që ka nevojë për shërbime nga zyrat lokale dhe gjithashtu ka kufizuar llojet e shërbimeve që zyra lokale ofron gjatë një takimi me “InfoPass”. Emigrantët dhe avokatët e tyre duhet ta kërkojnë takimin nga USCIS-i dhe nuk mund ta caktojnë atë vetë thjesht online apo të paraqiten në zyrë pa takim. Disa zyra lokale bëjnë përjashtim nga kërkesa për takim në “InfoPass” në raste urgjente ekstreme. Por edhe në këto situata, do të kërkojnë prova që emigranti është përpjekur ta zgjidhë problemin e tij duke kërkuar një takim përmes Qendrës së Kontaktit të USCIS-it përpara se të paraqitet në zyrë – dhe do të kërkojnë prova të urgjencës.
Shërbimet e ofruara në një takim me “InfoPass”:
Në të kaluarën, emigrantët dhe avokatët e tyre mund të caktonin takime për të pyetur rreth statusit të çështjes së tyre ose për të bërë pyetje, por kjo nuk është më e mundur. Shërbimet e vetme që ofrohen në një takim me “InfoPass” janë: 1) Vula ADIT për ata që nuk kanë asnjë provë tjetër të qëndrimit të tyre të përhershëm; 2) Procedimi për ata që u është miratuar lehtësimi i emigracionit në Gjykatën e Emigracionit, duke përfshirë lëshimin e kartave të azilit I-94 dhe procedimin ADIT; 3) Leje Paraprake Urgjente për Udhëtim (Emergency Advance Parole), për situata që përmbushin udhëzimet e USCIS-it për kërkesat e përshpejtuara.
Si të Kërkoni një Takim: Emigrantët dhe avokatët e tyre kanë tre mundësi për të kërkuar një takim me “InfoPass”. 1) Në internet. 2) Duke telefonuar Qendrën e Kontaktit të USCIS-it në numrin 1-800-375-5283. 3) Duke përdorur “Emma”, funksionin e bisedës (chat) online të USCIS-it. Gjatë periudhave me fluks të lartë, USCIS-i e çaktivizon funksionin Emma.
Kur përdoret ndonjë nga shërbimet e mësipërme, avokatit i kërkohet të japë informacione identifikuese për të vërtetuar se USCIS-i e ka Formularin e tyre G-28 të regjistruar në dosje dhe më pas të përshkruajë arsyen e takimit të kërkuar me “InfoPass”. Zyrtari do të përcaktojë nëse takimi është i arsyeshëm dhe do të lëshojë një numër kërkese shërbimi. Më pas, USCIS-i do të telefonojë avokatin ose klientin brenda një periudhe të caktuar kohore (si p.sh. 72 orë) për të caktuar realisht takimin. Telefonatat kthyese mund të ndodhin edhe jashtë orarit normal të punës. Ndonjëherë USCIS-i do të telefonojë direkt emigrantin në vend të avokatit, edhe nëse kërkesën për takim e ka bërë avokati.
Mund të jetë e vështirë të flasësh vërtet me një operator kur telefonon Qendrën e Kontaktit të USCIS-it ose kur bisedon me Emma-n, pasi këto sisteme përpiqen shumë t’i inkurajojnë telefonuesit të përdorin mjetet e tyre të automatizuara. Emma tani ka një funksion përmes të cilit mund të kërkoni të flisni drejtpërdrejt me një operator (Live Agent). Megjithatë, Emma duket se çaktivizohet rregullisht kur USCIS-i përballet me një volum të lartë telefonatash. Kur telefonojnë Qendrën e Kontaktit, emigrantët thonë se u duhet të përsërisin shumë here fjalën “InfoPass” derisa arrijnë të lidhen me një operator. Në vitin 2023, USCIS-i prezantoi një procedurë të re për vulat ADIT, ku ata lëshojnë një dokument ADIT pa pasur nevojë që emigrantët të paraqiten fizikisht në zyrën lokale, bazuar në dokumentet që ndodhen tashmë në dosjen e USCIS-it.
Njerëzit thonë se USCIS-i nuk e ndjek gjithmonë këtë politikë. Shumë prej tyre raportojnë se u duhet të kërkojnë vazhdimisht takime me USCIS-in dhe më pas nuk marrin as dokument dhe as përgjigje telefonike për caktimin e takimit. Në mënyrë të ngjashme, procedimi i lehtësimeve të dhëna nga Gjykata e Emigracionit ka qenë i paqëndrueshëm. Disa avokatë raportojnë se klientët e tyre e marrin kartën e qëndrimit të përhershëm ose kartën e azilit I-94 brenda pak javësh nga miratimi i Gjykatës së Emigracionit, ndërsa të tjerë raportojnë se u duhet të pyesin vazhdimisht dhe të caktojnë takime me “InfoPass” për ta arritur këtë.
Avokatët duhet të dorëzojnë një njoftim të përfaqësimit, Formularin G-28, pranë USCIS-it. Nëse nuk e bëjnë këtë, zyrtari do të refuzojë të flasë me avokatin, edhe pse mund të mos ketë pasur asnjë mënyrë për të dorëzuar një formular G-28. Në këto rrethana, avokatët duhet ta kenë klientin e tyre në linjë gjatë telefonatave me USCIS-in.
Çdo rast paraqet fakte dhe rrethane unike, dhe ky artikull vlen thjesht si udhëzues i përgjithshëm. Ky artikull nuk e zëvendëson konsultën individuale ligjore me një avokat që njeh mirë faktet dhe rrethanat që një person i caktuar ka paraqitur në çështjen e tij ose të saj. Ju bëjmë thirrje që për rastin tuaj konkret, të këshilloheni me një profesionist me përvojë në fushën e emigracionit. Qёllimi ynё ёshtё tё ndihmojmё komunitetin shqiptar dhe të bëjmë të mundur që emigrantёt të kenë informacionin e nevojshëm pёr tё kёrkuar ndihmё nё mёnyrё tё pavarur. Ju inkurajojmë që komentet apo pyetjet tuaja t’i bëni përmes telefonit apo e-mail-it. Adresa elektronike është: info@bothlaw.com