Pyetje nga lexuesit: përgjigjet Avokati Kieran Both
Nëna ime është shtetase amerikane dhe po paraqet një peticion emigracioni për mua. Problemi është se unë kam një precedent penal. E kam vuajtur dënimin dhe jam rehabilituar. Jam dënuar në vitin 2015. Aplikimi im për vizë u refuzua. A do të kem ndonjëherë mundësi të marr vizë nga Ambasada e SHBA-së? Faleminderit.
Anonim
Kjo është një pyetje e ndërlikuar. Ka shumë faktorë që përfshihen në raste të tilla dhe çdo rast është unik. Ne mund të ofrojmë vetëm informacion të përgjithshëm mbi ligjin në këtë fushë. Familja e lexuesit duhet të këshillohet me një avokat emigracioni me përvojë përpara se të vazhdojë më tej.
Akti i Emigracionit dhe Shtetësisë (INA) përcakton arsyet e papranueshmërisë dhe disa vepra penale mund të pengojnë hyrjen në SHBA si banor i përhershëm ose emigrant. Individët që konsiderohen të papranueshëm nuk lejohen me ligj të hyjnë ose të qëndrojnë në Shtetet e Bashkuara.
Një aplikant që ndodhet jashtë SHBA-së dhe ka pasur një intervistë për vizë me një zyrtar konsullor, dhe është shpallur i papranueshëm për shkak të një krimi, mund të ketë mundësi të aplikojë për një waiver (heqje të papranueshmërisë). Nëse një person kërkon një waiver ndërsa ndodhet jashtë SHBA-së dhe në lidhje me një vizë emigrimi, formulari që duhet të përdorë për të kapërcyer disa nga arsyet e papranueshmërisë është Formulari I-601, Application for Waiver of Grounds of Inadmissibility.
Nëse waiver-i I-601 miratohet, ju mund të hyni në SHBA me një vizë emigrimi. Në shumicën e rasteve, nëse ju jepet një waiver në lidhje me vizën tuaj të emigrimit, ai mbetet i vlefshëm për një kohë të pacaktuar.
Nëse shpalleni të papranueshëm për shkak të një krimi, mund të kërkoni waiver për këto raste:
- Krime që përfshijnë “turp moral” (Crime Involving Moral Turpitude – CIMT)
Shënim: Ju nuk konsideroheni të papranueshëm për një CIMT dhe nuk keni nevojë të paraqisni një waiver nëse:
- krimi ishte një vepër thjesht politike;
- krimi ishte CIMT, por keni kryer vetëm një të tillë, keni qenë nën 18 vjeç kur është kryer krimi dhe jeni liruar nga çdo burgim më shumë se 5 vjet para aplikimit;
- krimi ishte CIMT, por keni kryer vetëm një të tillë, dënimi maksimal i mundshëm ishte një vit ose më pak burg, dhe dënimi real që keni marrë ka qenë 6 muaj ose më pak.
Raste të tjera për të cilat mund të kërkohet waiver përfshijnë:
- Shkelje të ligjeve për substancat e kontrolluara lidhur me një vepër të vetme për posedim të thjeshtë të 30 gramëve ose më pak marihuanë;
- Dy ose më shumë dënime penale, përveç atyre thjesht politike, për të cilat dënimet me burgim arrijnë në total pesë vjet ose më shumë;
- Prostitucionin;
- Veprimtari të paligjshme komerciale të imoralitetit, edhe nëse nuk lidhen drejtpërdrejt me prostitucionin;
- Disa të huaj të përfshirë në veprimtari kriminale serioze që kanë siguruar imunitet nga ndjekja penale.
Waiver-i I-601 nuk është i disponueshëm për të gjitha arsyet e papranueshmërisë që lidhen me krimet dhe nuk është i disponueshëm për disa shtetas të huaj. Nëse jeni dënuar për një krim të dhunshëm ose të rrezikshëm, duhet të demonstroni “rrethana të jashtëzakonshme”, si për shembull konsiderata të sigurisë kombëtare ose të politikës së jashtme, ose të provoni se refuzimi i hyrjes do të shkaktonte “vështirësi të jashtëzakonshme ose tepër të pazakonta.” Edhe nëse përmbushet ky standard më i lartë, qeveria amerikane mund ta refuzojë kërkesën sipas diskrecionit të saj.
Waiver nuk mund të jepet nëse jeni dënuar për vrasje ose për vepra penale që përfshijnë torturë, apo për përpjekje ose komplot për të kryer vrasje ose torturë. Gjithashtu, nuk ka waiver për shumicën e dënimeve për drogë.
Me aplikimin I-601, duhet të provoni një nga këto:
- Jeni i papranueshëm vetëm për shkak të përfshirjes në prostitucion (përfshirë sigurimin e personave për prostitucion ose përfitimin nga të ardhurat e prostitucionit), por jeni rehabilituar dhe hyrja juaj në SHBA nuk do të jetë në kundërshtim me mirëqenien, sigurinë ose interesin kombëtar;
- Kanë kaluar të paktën 15 vjet nga aktiviteti ose ngjarja që ju bën të papranueshëm, jeni rehabilituar dhe hyrja juaj në SHBA nuk do të jetë në kundërshtim me mirëqenien, sigurinë ose interesin kombëtar;
- Një i afërm i kualifikuar që është shtetas amerikan ose banor i përhershëm ligjor do të përjetonte vështirësi ekstreme nëse juve do t’ju refuzohej hyrja.
Faktorët që USCIS merr në konsideratë për të përcaktuar vështirësinë ekstreme për të afërmin e kualifikuar përfshijnë, por nuk kufizohen në:
- shëndetin,
- gjendjen financiare,
- arsimin,
- rrethanat personale,
- faktorë të veçantë si pengesat kulturore, gjuhësore, fetare ose etnike,
- frikë të besueshme nga përndjekja, dëmtimi fizik ose rreziku,
- përjashtimin ose stigmatizimin shoqëror,
- mungesën e qasjes në institucione sociale për mbështetje dhe mbrojtje.
Aplikimi juaj duhet të mbështetet me dokumente provuese, ose duhet të shpjegoni në detaje pse nuk mund t’i siguroni ato. Vetëm deklarimet nuk mjaftojnë. Pretendimet mjekësore duhet të mbështeten me deklaratë nga një profesionist mjekësor.
Fakti që jeni i kualifikuar për waiver-in I-601 nuk do të thotë domosdoshmërisht se do ta merrni atë. Përveç plotësimit të kërkesave ligjore, duhet të paraqisni prova që tregojnë se faktorët pozitivë tejkalojnë faktorët negativë në rastin tuaj. Edhe nëse jeni i kualifikuar, agjencia mund ta refuzojë kërkesën sipas diskrecionit të saj.
Marrja e një waiver-i I-601 për arsye penale kërkon më shumë sesa thjesht dorëzimin e formularit dhe dokumenteve të listuara në udhëzime. Ju duhet gjithashtu t’i tregoni USCIS se si kualifikoheni për waiver-in dhe pse e meritoni atë sipas diskrecionit të tyre. Një avokat emigracioni me përvojë mund t’ju ndihmojë të rrisni mundësinë e miratimit duke paraqitur një analizë ligjore dhe duke shpjeguar se si përmbushni kërkesat për pranueshmëri.