Berlin, 16 maj 2024 – Deputeti i CDU/CSU në Bundestagun e Gjermanisë, Knut Abraham, ka thënë se Kosova i ka plotësuar të gjitha kriteret për anëtarësimin në Këshill të Evropës (KE) dhe se nuk e di përse nuk po kuptohet se kjo është mundësi historike.
Në debatin për 75-vjetorin e Këshillit të Evropës që u zhvillua të enjten në Bundestagun e Gjermanisë, Abraham e ka cilësuar si zhvillim të mrekullueshëm letrën e Qeverisë së Kosovës dërguar Këshillit të Evropës ku thuhet se drajtin e statutit të Asociacionit të komunave me shumicë serbe do ta dërgojë në Gjykatën Kushtetuese deri në fund të muajit. Ai ka thënë se Komiteti i Ministrave duhet të trajtojë çështjen e Kosovës në një seancë të veçantë në muajin qershor.
Abraham ka shkruar edhe në platformën “X” për fjalimin e tij në Bundestag.
“E inkurajova Qeverinë gjermane të marrë vendimin final për pranimin e Kosovës në Këshill të Evropës, pasi gjitha kushtet janë plotësuar. Qeveria e Kosovës ka premtuar në një letër dërguar Këshillit të Evropës se do të dorëzojë në Gjykatë Kushtetuese një statut për AKS-në deri në fund të majit. Është një zhvillim i ri i shkëlqyeshëm. Do të ishte ide shumë e mirë që Komiteti i Ministrave ta adresojë këtë çështje në një takim të veçantë në qershor. Do të ishte moment historik dhe Qeveria e Kosovës ka marrë një hap shumë të rëndësishëm këtu”, ka shkruar Abraham.
(r.m.)