Tiranë, 17 maj 2025 – Koalicioni Nisma Shqipëria Bëhet arriti të fitojë vetëm një deputet në Kuvendin e Shqipërisë, në zgjedhjet e 11 majit.
Adriatik Lapaj, në një postim në Facebook, ka thënë se ky koalicion duhet t’i kishte fituar 6 mandate, meqenëse i ka marrë afro 63 mijë vota. Ai thekson se ligji aktual për zgjedhjet është i padrejtë, prandaj thekson nevojën për ndryshimin e tij.
Lapaj e preferon modelin e Kosovës, sistemin proporcional kombëtar me lista të hapura .
“Koalicioni ynë duhet të kishte të paktën 6 mandate. Duhet ndryshuar ligji elektoral. Shikoni modelin e Kosovës, proporcional kombëtar me lista të hapura”, ka shkruar ai.
Postimi i plotë:
Lëvizja Shqipëria Bëhet u kthye në parti politike në dt. 30 shtator 2024.
Për 8 muaj, me gjithë vështirësitë që ju i dini i’a dolëm të renditemi forcë e 3 politike në vend (përballë atyre që kërcënojnë, blejnë dhe vjedhin votë).
Faleminderit secilit që na besoi me votë!
Sistemi elektoral u dëshmua para të gjithëve si i padrejtë. Ps e nxori 1 mandat me afro 10 000 vota, ndërsa koalicioni ynë me afro 63 000 (deri tani).
Ps ka marrë vota sa për 73 mandate, por ligji elektoral i padrejtë i ka dhënë 83.
Koalicioni ynë duhet të kishte të paktën 6 mandate. Duhet ndryshuar ligji elektoral. Shikoni modelin e Kosovës, proporcional kombëtar me lista të hapura.
Lëvizja Shqipëria Bëhet është e hapur për këdo beson te vlerat, të na bashkohet!
Nuk ka kthim pas!
(r.m.)