Beograd, 25 qershor 2025 – I ngarkuari me punë në Ambasadën iraniane në Serbi, Mohammad Mahdi Abadi, e ka falënderuar presidentin e Serbisë, Aleksandar Vuçiq për qëndrimin e tij se Shtetet e Bashkuara e kanë shkelur ligjin ndërkombëtar duke sulmuar Iranin, raporton agjencia e lajmeve Beta.
Vuçiq ka thënë një ditë më parë se Serbia dëshiron marrëdhënie të ngushta dhe partneritet strategjik me Shtetet e Bashkuara, por që nuk ka “asnjë dyshim” se SHBA-ja e ka shkelur ligjin ndërkombëtar me sulmin në Iran.
Duke folur për konfliktin mes Izraelit dhe Iranit, Vuçiq ka thënë se Serbia dëshiron paqe në Lindje të Mesme dhe Lindje të Afërt.
“Ne i konsiderojmë Izraelin dhe Iranin shtete mike”, ka shtuar ai.
Vuçiq ka thënë, gjithashtu, se është në kontakt me presidentët e të dyja këtyre shteteve.
Më 24 qershor, në një bashkëbisedim me gazetarët në Ambasadën iraniane në Beograd, Mahdi Abadi i ka falënderuar të gjitha shtetet që e kanë dënuar sulmin amerikan në qendrat bërthamore iraniane, përfshirë Serbinë, Kinën dhe Rusinë.
Ai ka thënë se ende nuk ka konfirmim zyrtar për një takim mes presidentit të Serbisë dhe atij të Iranit, dhe kur është pyetur për të komentuar njoftimin e Serbisë për pezullim të eksporteve të armëve, ai ka thënë se nuk përzihet në punët e brendshme të shteteve tjera.
Më 23 qershor, Vuçiq ka thënë se Serbia e ka ndalur eksportin e armëve.
Ditën pasuese ai ka thënë se vetëm Këshilli i Sigurisë Kombëtare mund të vendosë për eksportin e municioneve në periudhën e ardhshme.
Rreth 10 ditë më herët, para sulmit të Izraelit ndaj Iranit, Vuçiq ka thënë se Serbia është vendi i vetëm në Evropë që ka bërë biznes me Izraelin në fushën e municioneve ushtarake.