Lubjanë, 27 prill 2024 – Ish-presidenti i Sllovenisë, Borut Pahor, i cili mund ta marrë detyrën e emisarit të Bashkimit Evropian për dialogun Kosovë – Serbi, në vend të Miroslav Lajçakut që pritet të largohet nga kjo detyrë, po e përgatit një draft për vazhdimin e bisedimeve midis dy palëve.
Të shtunën, në profilin e tij në “X”, Pahor ka shkruar se fillimisht draftin do ta harmonizojë me përfaqësuesin e Lartë të BE-së për Politikë të Jashtme, Josep Borrell, dhe me vendet anëtare të BE-së, veçanërisht me ato të QUINT-it (SHBA-ja, Britania e Madhe, Gjermania, Italia, Franca). Ai ka treguar se nuk do t’u përgjigjet kërkesave të gazetarëve për intervista derisa po pret ta marrë rolin drejtues në dialogun Kosovë – Serbi.
“Lidhur me kërkesat që po merr ish-Presidenti Pahor në pritje të rolit të tij si kandidat për Përfaqësues Special të Bashkimit Evropian për dialogun Beograd-Prishtinë dhe për çështje të tjera rajonale në Ballkanin Perëndimor, ai aktualisht nuk po i përgjigjet asnjë pyetjeje apo kërkese për intervistë deri në një njoftim të dytë.
Ish-presidenti Pahor është duke e përgatitur një draft për vazhdimin e dialogut, por dëshiron që fillimisht atë ta harmonizojë me përfaqësuesin e Lartë për Politikë të Jashtme e të Sigurisë, Josep Borrell, dhe me vendet anëtare të BE-së, veçanërisht me vendet e QUINT-it”, thuhet në postimin e z. Pahor.
“Former President Pahor is preparing a draft outline for the continuation of the dialogue, but he wishes to first coordinate it with the High Representative for Foreign and Security Policy, Borrell, and EU member states, especially the Quint countries.” 2/2
— Borut Pahor (@BorutPahor) April 27, 2024
Miroslav Lajçak do ta përfundojë mandatin e tij 4 vjeçar të përfaqësuesit special të Bashkimit Evropian për dialogun Kosovë – Serbi në gusht të këtij viti. Ish-presidenti slloven, Borut Pahor, përmendet si zëvendësues i Lajçakut në këtë detyrë.
(r.m.)