Uashington, 27 maj 2023 – Janusz Bugajski, bashkëpunëtor i lartë në Fondacionin Jamestown në Washington, ka reaguar lidhur me deklaratën e sekretarit amerikan të Shtetit, Anthony Blinken, i cili dënoi ashpër aksionin e Policisë së Kosovës në veri.
Bugajski e ka krahasuar refuzimin e SHBA-së për të njohur kryetarët e rinj të komunave në veri të Kosovës me refuzimin e rezultatit të zgjedhjeve presidenciale të vitit 2020 në SHBA nga ish-presidenti Donald Trump.
Bugajski ka thënë se mbështetja e SHBA-së për Vuçiqin po e destabilizon rajonin dhe ka bërë thirrje për mbështetjen e “një revolucioni demokratik” në Serbi.
“Është ekuivalenti i dënimit të Kongresit Amerikan që certifikoi zgjedhjet e vitit 2020 dhe legjitimimit të kryengritjes së 6 janarit. Mbështetja e SHBA-së për Vuçiqin po e destabilizon rajonin. Është koha për të mbështetur një revolucion demokratik në Serbi dhe njohjen e Kosovës nga të gjitha shtetet evropiane”, ka shkruar Bugajski në Twiitter.
The equivalent of condemning the US congressional certification of the 2020 elections and legitimizing the 6 January insurrection. US support for Vucic is destabilizing the region. Time to back a democratic revolution in Serbia and recognition of Kosovo by all European states.
— Janusz Bugajski (@JBugajskiUSA) May 26, 2023
Sekretari amerikan i Shtetit, Antony Blinken, e ka dënuar vendosjen me forcë të kryetarëve të rinj të komunave të Zveçanit, Leposaviqit dhe Zubin Potokut në zyrat e këtyre komunave. Ai ka thënë se këto aksione “e përshkallëzojnë situatën në veri”.
(r.m.)