Cameron i vizitoi trupat britanike të KFOR-it, e vlerësoi përkushtimin e tyre për sigurinë në Kosovë e rajon

-

Prishtinë, 4 janar 2024 – Sekretari i Jashtëm i Mbretërisë së Bashkuar, Lordi David Cameron, e ka vizituar të enjten trupat britanike në misionin e NATO-s në Kosovë, KFOR.

Gjatë takimit ai i ka falënderuar ushtarët britanikë për shërbimin në Kosovë dhe e ka vlerësuar përkushtimin e tyre për sigurinë në Kosovë dhe në mbarë rajonin.

“I falënderova trupat britanike në përbërje të NATO-KFOR për shërbimin dhe përkushtimin e tyre në mbështetje të sigurisë në Kosovë dhe rajon.

KFOR-i luan një rol thelbësor për të ndihmuar në ruajtjen e një mjedisi të qetë e të sigurtë për të gjithë në Kosovë, duke forcuar sigurinë dhe stabilitetin në mbarë Ballkanin Perëndimor”, ka shkruar Cameron në një postim në platformën X.

Sekretari i Jashtëm i Mbretërisë së Bashkuar arriti në Kosovë të mërkurën në mbrëmje. Mbrëmë ai u takua me kryeministrin Albin Kurti, ndërsa sot u takua edhe me Presidenten Vjosa Osmani dhe me ministren e Punëve të Jashtme, Donika Gërvalla.

Në të gjitha takimet ai tha se Mbretëria e Bashkuar do të vazhdojë ta mbështesë Kosovën në fushën e sigurisë dhe procesin e fuqizimit në planin ndërkombëtar.

Mbretëria e Bashkuar është krenare për partneritetin e saj të vazhdueshëm me Kosovën si një mbështetëse e gjatë e pavarësisë së saj.

“iFalënderoj ministren e Jashtme Donika Gërvalla-Schwarz, Presidenten e Republikës së Kosovës Vjosa Osmani dhe kryeministrin Albin Kurti për takimet me mua për të diskutuar se si mund të punojmë së bashku për të ruajtur stabilitetin në Ballkanin Perëndimor”, ka shkuar Cameron në platformës X.

(r.m.)