Aktualisht, të gjitha agjensitë qeveritare janë të financuara deri më 30 shtator 2026, me përjashtim të Departamentit të Sigurisë Kombëtare (DHS), i cili funksiononte me financim afatshkurtër deri më 13 shkurt 2026. Më 12 shkurt, Senati nuk arriti të miratonte projektligjin e ndarjeve buxhetore për DHS-në, ndaj financimi për këtë agjensi përfundoi më 14 shkurt.
Gjatë mungesës së financimit për DHS-in, shumë – në mos të gjitha – funksionet e këtij departamenti mund dhe do të vazhdojnë të operojnë, në varësi të atyre që Administrata i konsideron “thelbësore”. Edhe pse departamenti është teknikisht i mbyllur, shumica dërrmuese e operacioneve të tij vazhdojnë, me pjesën më të madhe të personelit që mbetet në detyrë pa pagesë, ashtu si ndodhi edhe gjatë mbylljes së vjeshtës së kaluar. Megjithatë, sa më gjatë të zgjasë ngërçi, aq më shumë udhëtarët dhe të tjerë mund të ndiejnë efektet e tij.
Zakonisht, kur agjensitë qeveritare mbyllen për arsye buxhetore, të gjithë punonjësit përveç atyre “thelbësorë” dërgohen në pushim të detyruar dhe nuk lejohen të punojnë. Më poshtë është një përmbledhje e mënyrës se si kanë funksionuar agjensitë e lidhura me emigracionin gjatë mbylljeve të mëparshme.
USCIS
Shërbimi i Shtetësisë dhe Emigracionit i Shteteve të Bashkuara (USCIS) financohet kryesisht nga tarifat e emigrantëve dhe të aplikuesve për viza, prandaj edhe në rast mbylljeje të qeverisë zakonisht vazhdon punën normalisht. Përjashtim bëjnë programet që financohen nga fondet buxhetore – E-Verify, Programi EB-5 i Qendrave Rajonale për Investitorët Emigrantë, programi Conrad 30 për mjekët J-1 dhe punonjësit fetarë jo-ministra – të cilat pezullohen ose ndikohen ndryshe. Programi EB-5 i Qendrave Rajonale nuk pritet të ndikohet nga mbyllja, pasi është i autorizuar deri më 30 shtator 2027.
USCIS ka konfirmuar më parë se punëdhënësit mund të vazhdojnë të përdorin procesin alternativ të verifikimit për dokumentet I-9 në distancë, edhe nëse E-Verify është përkohësisht i padisponueshëm për shkak të mbylljes së qeverisë. Pritet që kjo praktikë të vazhdojë, pasi agjensia nuk ka njoftuar për ndryshime. Gjatë mbylljes së qeverisë në vitin 2025, shërbimet E-Verify rifilluan rreth një javë pas fillimit të mbylljes.
Në të kaluarën, pas rihapjes së qeverisë, USCIS ka pranuar aplikime të vonuara I-129, me kusht që kërkesa të shoqërohej me prova se arsyeja kryesore e mosdorëzimit në kohë të kërkesës për zgjatje qëndrimi ose ndryshim statusi ishte mbyllja e qeverisë.
CBP
Agjentët e Kontrollit Kufitar dhe Mbrojtjes Kufitare (CBP) për inspektim dhe zbatim të ligjit konsiderohen “thelbësorë”. Pikat e hyrjes do të qëndrojnë të hapura dhe përpunimi i udhëtarëve do të vazhdojë; megjithatë, përpunimi i aplikimeve të paraqitura në kufi mund të ndikohet.
ICE
Në përgjithësi, Operacionet e Zbatimit dhe Largimit (ERO) të ICE-s vazhdojnë punën. Avokatët ndihmës të Zyrës së Këshilltarit Kryesor Ligjor (OPLA) përqendrohen në përfaqësimin e qeverisë në çështjet e të ndaluarve në gjykatat e emigracionit gjatë një mbylljeje.
Programi për Studentët dhe Vizitorët e Shkëmbimit (SEVP) i ICE-it nuk ndikohet, pasi financohet nga tarifa. Anëtarët duhet të kenë mundësi të vazhdojnë të kontaktojnë klientët e tyre në ndalim përmes mjeteve të zakonshme, si planifikimi i telefonatave dhe vizitave.
DiP
Departamenti i Punës (DiP) është financuar për pjesën e mbetur të vitit fiskal 2026 dhe nuk pritet të ndikohet nëse Kongresi nuk zgjat financimin për DHS-in.
DASH
Departamenti i Shtetit (DOS) është financuar për pjesën e mbetur të vitit fiskal 2026 dhe nuk pritet të ndikohet nëse Kongresi nuk zgjat financimin për DHS-in.
EOIR
Zyra Ekzekutive për Rishikimin e Emigracionit (EOIR) është financuar për pjesën e mbetur të vitit fiskal 2026 dhe nuk pritet të ndikohet nëse Kongresi nuk zgjat financimin për DHS-in. Palët në gjykatë duhet të kontrollojnë statusin operacional të Gjykatave të Emigracionit për përditësimet më të fundit.
Shërbimet për Zgjedhësit nga Kongresi
Dega Legjislative është financuar gjithashtu për pjesën e mbetur të vitit fiskal 2026; për rrjedhojë, zyrat e kongresmenëve nuk pritet të ndikohen nëse Kongresi nuk zgjat financimin për DHS-in.
Mbyllja e pjesshme e qeverisë filloi të shtunën pasi demokratët në Kongres dhe ekipi i Presidentit Donald Trump nuk arritën një marrëveshje për financimin e departamentit deri në shtator. Demokratët kërkojnë ndryshime në mënyrën se si zhvillohen operacionet e emigracionit, pas vrasjeve fatale të shtetasve amerikanë Alex Pretti dhe Renee Good nga oficerë federalë në Minneapolis muajin e kaluar.
Departamenti i Sigurisë Kombëtare (DHS) ka kritikuar demokratët, duke pretenduar se ata po vendosin politikën përpara sigurisë publike dhe po minojnë aftësinë e departamentit për të mbajtur amerikanët të sigurt.
Vlen t’ju kujtojmë që çdo çështje konkrete emigracioni paraqet rrethanat e saj unike dhe ky artikull shërben thjesht si udhëzues i përgjithshëm. Kjo rubrikë nuk e zëvendëson konsultën individuale ligjore me një avokat që njeh mirë faktet dhe rrethanat që një person i caktuar ka paraqitur në çështjen e tij ose të saj. Ju bëjmë thirrje që për rastin tuaj konkret, të këshilloheni me një profesionist me përvojë në fushën e emigracionit. Qёllimi ynё ёshtё tё ndihmojmё komunitetin shqiptar dhe të bëjmë të mundur që emigrantёt të kenë informacionin e nevojshëm pёr tё kёrkuar ndihmё nё mёnyrё tё pavarur. Ju inkurajojmë që komentet apo pyetjet tuaja t’i bëni përmes telefonit apo e-mail-it. Adresa elektronike është: info@bothlaw.com