Presidenti autoritar i Serbisë, Aleksandar Vuçiq, njihet për aspiratën për kontrolluar të gjitha fushat e jetës në Serbi. Por, papritur paralajmëroi dorëheqje nga kjo pozitë! Çfarë fshihet pas kësaj?
Dhjetëra mijëra mbështetës të tij – disa vullnetarisht, disa nën presion – mbërritën në Beograd nga e gjithë Serbia të shtunën, si zakonisht, me autobusë, në mënyrë të organizuar. Pastaj idhulli i tyre, Aleksandar Vuçiq, e mori mikrofonin në podiumin përpara parlamentit për të njoftuar largimin e tij të parakohshëm nga posti më i lartë i shtetit!
“Do të jem President vetëm edhe për disa javë të tjera dhe pastaj do të jap dorëheqje”, tha Aleksandar Vuçiq, në një tubim të madh në qendër të Beogradit.
Ai shtoi se udhëheqjes së Partisë Progresive Serbe (SNS) në pushtet i ofroi ndihmë në zgjedhjet e ardhshme. Lista e tij zgjedhore duhet të mbajë emrin “Serbia e Bashkuar”, që të kujton emrin “Rusia e Bashkuar”, partia e Presidentit rus Vladimir Putin. Vuçiq njihet për faktin se ndonjëherë kërkon afërsi me Rusinë dhe ndonjëherë me Bashkimin Evropian.
Një kalim në karrigen e Kryeministrit?
“Kjo nuk do të thotë aspak fundi i karrierës politike të Vuçiq”, tha analisti Radivoje Grujiq për agjencinë e lajmeve Reuters.
Sipas tij, Vuçiq tashmë ka një plan që nuk përfshin daljen në pension politik.
Mandati i dytë presidencial i Vuçiqit përfundon në fund të majit të vitit të ardhshëm. Ai nuk mund të kandidojë për herë të tretë. Mandati i parlamentit aktual zgjat deri në shkurt 2028. Pritet që Vuçiq të shpallë zgjedhje të parakohshme parlamentare dhe, sipas disa burimeve, do të përpiqet të marrë postin e Kryeministrit, në rast fitorje në zgjedhje.
Ai vetë ka lënë të kuptohet në disa raste se zgjedhjet e parakohshme parlamentare mund të mbahen këtë vit, por ende nuk ka njoftuar një datë specifike.
Ai, si president, formalisht ka kryesisht kompetenca protokollare. Megjithatë, në praktikë, që nga viti 2012, ai vendos në mënyrë të pavarur për të gjitha çështjet e rëndësishme në Serbi, pavarësisht nga pozicioni që mban. Ai ishte Kryeministër nga viti 2014 deri në vitin 2017.
Protestat dhe presioni
Që nga shembja në stacionin hekurudhor në Novi Sad në nëntor 2024, Vuçiq dhe qeveria serbe kanë qenë nën presion të fortë nga një lëvizje masive protestash. Në atë aksident, 16 persona vdiqën pas rënies së një pjese të çatisë që, me sa duket, ishin instaluar në mënyrë të papërshtatshme.
Protestuesit, opozita dhe organizatat e të drejtave të njeriut besojnë se shkaku i tragjedisë është keqmenaxhimi i projekteve shtetërore të ndërtimit dhe paaftësia e institucioneve kompetente. Sistemi gjyqësor, i cili është nën ndikimin e Vuçiqit, deri më tani e ka penguar ndjekjen penale të personave përgjegjës.
Lëvizja protestuese ka kërkuar zgjedhje të parakohshme parlamentare për rreth një vit.
Savo Manojloviq, një nga udhëheqësit studentorë, tha se Vuçiq po përpiqet të parandalojë rënien e tij të pashmangshme politike të shkaktuar nga protestat duke thirrur zgjedhje të parakohshme.
Megjithatë, Vuçiq, në tubimin e së shtunës, i akuzoi protestuesit se donin ta shkatërronin Serbinë dhe i akuzoi ata se bashkëpunonin me fuqi të huaja të paidentifikuara. Nëse SNS i fiton zgjedhjet, ai premtoi fundin e korrupsionit, pensione më të larta dhe përmirësime në sistemin shëndetësor shtetëror.
Nga ana tjetër, opozita akuzon Vuçiqin dhe aleatët e tij për dhunë ndaj kundërshtarëve politikë, për korrupsion të përhapur, për lidhje me krimin e organizuar dhe për shtypje të lirisë së medies.
Fitorja e partisë në pushtet nuk është e sigurt
Sipas sondazheve, një listë e hartuar ose e mbështetur nga studentët mund t’i fitojë zgjedhjet e ardhshme parlamentare. Një listë e tillë unike në nivel kombëtar ende nuk ekziston. Megjithatë, studentët kanë arritur tashmë rezultatet e para të dukshme në zgjedhjet lokale.
Lëvizja protestuese mbledh rregullisht një numër të madh qytetarësh në rrugë. Muajin e kaluar, rreth 180,000 njerëz protestuan kundër qeverisë në qendër të Beogradit, sipas vlerësimeve të Arkivit të Tubimeve Publike, një organizatë profesionale e pavarur.
Balancimi midis Bashkimit Evropian, Rusisë dhe Kinës
Tensionet e brendshme politike po ndodhin në një kohë kur Serbia po ndjek një politikë të ndjeshme balancimi në frontin e politikës së jashtme. Vendi është kandidat për anëtarësim në Bashkimin Evropian, por, në të njëjtën kohë, mban marrëdhënie të ngushta me Rusinë dhe me Kinën.
Para se të bashkohet me BE-në, Serbia duhet të përmirësojë sundimin e ligjit, i cili përfshin sigurimin e kushteve për zgjedhje të lira e të ndershme dhe luftë më efektive kundër korrupsionit dhe krimit të organizuar.
Bashkimi Evropian kërkon që autoritetet në Beograd të përafrojnë politikën e jashtme të Serbisë me politikën e përbashkët të jashtme të BE-së.