Uashington, 19 nëntor 2022 – Këshilltari i Departamentit amerikan të Shtetit, Derek Chollet, njoftoi të premten në mbrëmje se ka biseduar me telefonme kryeministrin e Kosovës, Albin Kurti, për shmangien e përshkallëzimit të mëtejmë të situatës në pjesën veriore të Kosovës, për shtyrjen e gjobave për targat e automjeteve të lëshuara nga Serbia, për kthimin e serbëve në institucionet e të Kosovës dhe për përqendrimin në bisedimet për normalizimin e raporteve me Serbinë.
“Me kryeministrin e Kosovës, Albin Kurti, bisedva për shmangien e përshkallëzimit të mëtejmë, shtyrja e dënimeve për targat, mbajtjen e derës së hapur për kthimin e serbëve të Kosovës në institucione dhe përqendrimin në bisedimet për normalizimin me Serbinë, si rruga më e mirë për çuarjen përpara të integrimit evropian dhe euroatlantik të Kosovës”, shkroi Cholet në Twitter.
Spoke with Kosovo PM @albinkurti on avoiding further escalation: postpone license plate penalties, keep the door open to Kosovan Serbs’ return to institutions, and focus on normalization Dialogue with Serbia = best path to advance Kosovo’s European & Euro-Atlantic integration.
— Derek Chollet (@CounselorDOS) November 19, 2022
Më herët, kryeministri i Kosovës, Albin Kurti, shkroi në Twitter se me z. Chollet ka biseduar për “domosdoshmërinë e një marrëveshjeje të plotë të normalizimit me Serbinë me njohjen e ndërsjellë në qendër, me fokus në situatën e sigurisë në Kosovë së bashku me sundimin e ligjit”.
“Bisedë e sinqertë dhe e rëndësishme telefonike me nënsekretarin e shtetit Derek Chollet për domosdoshmërinë e një marrëveshjeje të plotë të normalizimit me Serbinë me njohjen reciproke në qendër, me fokus në situatën e sigurisë në Kosovë së bashku me sundimin e ligjit”, shkroi Kurti.
Frank and important phone conversation with State Undersecretary Derek Chollet on the necessity for a full normalization agreement with Serbia centered on mutual recognition, with a focus on the security situation in Kosova coupled with the rule of law.
— Albin Kurti (@albinkurti) November 18, 2022
Që nga vendimi i Qeverisë për riregjistrimin e automjeteve me targa ilegale të lëshuara në Serbi me targat legale RKS (Republika e Kosovës), në fund të qershorit, situata në veri është e tensionuar.
Nga 1 nëntori, Qeveria e Kosovës ka nisur zbatimin e planit të saj për riregjistrimin e automjeteve. Faza e parë e planit parasheh qortimin e shoferëve që ngasin e automjete me targa të paligjshme. Më 21 nëntor pritet të hyjë në fuqi faza e dytë – shqiptimi i gjobës prej 150 eurosh.
Serbia dhe popullata serbe në veri të Kosovës janë duke e kundërshtuar këtë vendim dhe insistojnë të përdorin targa neutrale ndaj statusit të Kosovës (KS), të cilat tashmë janë nxjerrë nga përdorimi.
Si pasojë e tensioneve të rritura, serbët e veriut i kanë braktisur institucionet e Kosovës.
Kryediplomati evropian, Josep Borrell, ka thënë se 21 nëntori “nuk duhet të na gjejë pa marrëveshje për targat” dhe situatën aktuale të krijuar për targat e ka konsideruar si “krizën më serioze në dhjetë vjetët e fundit”.
Zëdhënësi i Bashkimit Evropian për Politikë të Jashtme dhe Siguri, Peter Stano, ka thënë se kryeministri i Kosovës, Albin Kurti, dhe presidenti i Serbisë, Aleksandar Vuçiq, janë ftuar që “së shpejti” të shkojnë në Bruksel për të gjetur zgjidhje për targat ilegale serbe.
Sipas burimeve të Radios Evropa e Lirë, palët janë ftuar për të diskutuar të dielën pasdite, ose më së voni të hënën në mëngjes.
As Qeveria e Kosovës e as Presidenca e Serbisë nuk kanë konfirmuar ende nëse Kurti dhe Vuçiqi do të shkojnë në takim.
(r.m.)