Uashington, 23 mars 2023 – Këshilltari i lartë i Departamentit amerikan të Shtetit, Derek Chollet, ka njoftuar për bisedën telefonike që ka zhvilluar të enjten me kryeministrin e Kosovës, Albin Kurti.
Në një postim në Twitter, Chollet ka treguar se Kryeministrin Kurti e ka përgëzuar për marrëveshjen drejt normalizimit të marrëdhënieve me Serbinë.
Ai ka thënë se tani Kosova është më afër se kurrë të ardhmes së saj drejt BE-së.
“Kam uruar sot kryeministrin Albin Kurti për marrëveshjen e arritur në Ohër të Maqedonisë së Veriut për normalizimin e marrëdhënieve me Serbinë përmes dialogut të lehtësuar nga BE-ja. Kosova tani është më afër se kurrë të ardhmes së saj drejt BE-së”, ka shkruar Chollet.
Congratulated Prime Minister @albinkurti today on the agreement reached in Ohrid, North Macedonia, on normalization of relations with Serbia through the EU-Facilitated Dialogue. Kosovo now closer than ever to its EU future.
— Derek Chollet (@CounselorDOS) March 23, 2023
Kryeministri është kritikuar ashpër nga opozita në Kuvendin e Kosovës për pranimin e marrëveshjes drejt normalizimit të marrëdhënieve me Serbinë. Deputetët opozitarë e kanë kritikuar Kurtin sidomos për nenin e marrëveshjes që ka të bëjë me Asociacionin e komunave me shumicë serbe në Kosovë.
Në Marrëveshjen Bazë dhe në Aneksin e saj nuk përmendet shprehimisht Asociacioni, por përdoret shprehja “vetëmenaxhim” për komunitetin serb në Kosovë. Sipas opozitës, kjo shprehje në thelb do të thotë “vetëqeverisje”, gjë që bie ndesh me Kushtetutën e Kosovës.
Zyrtarët dhe diplomatët e Shteteve të Bashkuara të Amerikës kanë deklaruar në disa raste se Asociacioni i komunave me shumicë serbe duhet të jetë në harmoni me Kushtetutën e Kosovës.
(r.m.)