Dënohet ashpër plagosja e dy të rinjëve në Drajkovc të Shtërpcës

-

Prishtinë, 6 janar 2023 – Autoritetet e Kosovës e kanë dënuar ashpër rastin e plagosjes së dy të rinjëve serbë në fshatin Drajkovc të komunës së Shtërpcës.

Presidentja e Kosovës, Vjosa Osmani, në njëdeklaratë për publikun, ka thënë se ky është një akt  I  papranueshëm. Ajo u ka uruar shërim të shpejtë të plagosurve, ndërkasa organeve të sigurisë u ka kërkuar që rastin ta trajtojne urgjentisht e sipas ligjit.

“Plagosja e të rinjve 11 dhe 21 vjeçar në Shtërpcë është akt i patolerueshëm, ndaj autori duhet të vihet para drejtësisë.

Institucionet e Kosovës janë të përkushtuara maksimalisht që qytetarëve pa dallim etnie t`u ofrohet ambient i sigurt dhe i qetë.

Të plagosurve ju dëshiroj shërim të shpejtë, ndërkaq ftoj organet e sigurisë që rastin ta trajtojne urgjentisht e sipas ligjit”, thuhet në deklaratën e Presidentes Osmani.

Sulmin ndaj dy të rinjëve serbë e ka dënuar ashpër edhe kryeministri i Kosovës, Albin Kurti.

Edhe ai u ka uruar shërim të shpejtë dy të plagosurve, duke siguruar se autori do të përballet më drejtësinë.    

‘E dënoj ashpër sulmin ndaj dy qytetarëve të Kosovës në Shtërpcë. Thellësisht i brengosur për plagosjen e tyre. Sipas informatave, të rinjtë 11 dhe 21 vjeçar janë jashtë rrezikut për jetë dhe ju dëshiroj shërim të shpejtë. Policia e Kosovës veçse ka arrestuar të dyshuarin i cili pa asnjë mëdyshje duhet dhe do të përballet me organet e drejtësisë.

Njësitet relevante do të vazhdojnë hetimet deri në zbardhjen e të gjitha rrethanave të këtij akti të papranueshëm dhe të dënueshëm.

Dua të siguroj të gjithë qytetarët se Policia e Kosovës është e angazhuar maksimalisht në kryerjen e detyrave të saj me qëllim të mbrojtjes së jetës dhe pronës së të gjithëve pa dallim”, ka shkruar Kurti në Facebook dhe në Twitter.

Ministri i Mbrojtjes i Kosovës, Armend Mehaj, ka konfirmuar se i dyshuari për plagosjen e dy të rinjëve serbë në Drajkovc të Shtërpcës është pjesëtar i Forcës së Sigurisë së Kosovës.

Mehaj, në një postim në Facebook, Mehaj e ka dënuar ashpër aktin, duke theksuar se aktet si ky nuk guxojnë të ndodhin, ndërsa të plagosurve u ka uruar shërim sa më të shpejtë. .

“Tani u njoftova se në rastin që ka ndodhur në Shtërpcë është përfshirë një pjesëtar i Forcës së Sigurisë së Kosovës. Me rastin janë duke u marrë organet e sigurisë dhe drejtësisë. I njëjti do ta trajtohet edhe sipas rregulloreve dhe ligjeve që kemi në fuqi në Ministrinë e Mbrojtjes dhe Forcës së Sigurisë.

Shpreh keqardhjen më të thellë për atë që ka ndodhur në Shtërpcë. Të plagosurve, u uroj shërim sa më të shpejtë. Raste si kjo janë të izoluara, por si të tilla nuk guxojnë të ndodhin.

Ministria e Mbrojtës dhe Forca e Sigurisë së Kosovës mbeten të përkushtuar për t’i shërbyer qytetarëve tanë pa dallim”, ka shkruar Mehaj.

Plagosjen e dy të rinjëve serbë e kanë dënuar ashpër edhe shefat e misioneve diplomatike në Kosovë.

Oliver Varhelyi, komisionar i Bashkimit Evropian për Fqinjësi dhe Zgjerim është shprehur “i tronditur nga sulmi i sotëm ndaj dy fëmijëve në Shtërpcë”.

“Nuk mund të ketë asnjë justifikim për asnjë dhunë. Atyre u uroj shërim të shpejtë. Besoj se një hetim i plotë do të kryhet nga autoritetet e Kosovës”, ka shkruar Varhelyi në Twitter.

Misioni i OSBE-së në Kosovë ka dënuar sulmin ndaj dy qytetarëve të Kosovës në Shtërpcë.

Ky mision e vlerëson reagimin e shpejtë i Policisë së Kosovës për kapjen e autorit të dyshuar dhe bën thirrje për nxjerrjen e tij para drejtësisë.

“Ne dënojmë me termat më të ashpër të shtënat me makinë në afërsi të Shtërpcës më herët gjatë ditës së sotme, në të cilën u plagosën dy persona. Veprimi i shpejtë i Policisë së Kosovës në arrestimin e një autori të dyshuar është i mirëseardhur dhe duhet të ndiqet nga personat përgjegjës që të sillen para drejtësisë”, thuhet në postimin e OSBE-së në Twitter.

Edhe ambasadori britanik në Kosovë, Nicholas Abbott, e ka shprehur shqetësimin për plagosjen e dy të rinjve në Shtërpcë.

“U shqetësova kur dëgjova për sulmin ndaj dy të rinjve serbë të Kosovës dhe mirëpres arrestimin e shpejt të të dyshuarit. Të plagosurve u uroj shërbim të shpejtë”, ka shkruar Abbott në Twitter.

Ambasadori i Gjermanisë në Kosovë, Jorn Rohde, e ka dënuar sulmin ndaj dy të rinjëve në Shtërpcë dhe e ka mirëpritur reagimin e shpejtë të policisë së Kosovës.

“Dënoj sulmin ndaj dy djemve të rinj në Shtërpcë sot dhe u uroj shërim të shpejtë. Ne mirëpresim reagimin e shpejtë të policisë së Kosovës”, ka shkruar Rode në Facebook.

https://www.facebook.com/albini2017/posts/716527359840994

(r.m.)