Prishtinë, 20 gusht 2023 – Diaspora e Kosovës edhe këtë vit ka vazhduar të jetë kontribuuese për Kosovën. Sipas Bankës Qendrore të Kosovës (BQK), për gjashtë mujorin e parë të këtij viti, ka rritje të dërgesave nga diaspora.
Besnik Kada nga Banka Qendrore e Kosovës ka thënë se gjatë periudhës janar-qershor 2023, shuma e remitancave është rreth 633 milionë euro.
“Krahasuar me 555 milionë e 400 mijë euro në vitin 2022, kemi një rritje prej 77.5 milionë eurosh krahasuar me gjashtë mujorin e njëjtë të vitit paraprak”, ka thënë Kada për RTK-në.
Ai bëri me dije se shteti nga i cili më së shumti janë regjistruar remitancat është Gjermania.
“Në tremujorin e parë të këtij viti nga Gjermania kanë ardhur 38.8 milionë euro, në ndërkohë vitin e kaluar, pra gjatë 12 muajve nga Gjermania kanë ardhur 161.5 milionë euro. Në ndërkohë nga Zvicra në tremujorin e parë kanë ardhur 17.2 milionë, pasuar nga SHBA-të me 7.6 milionë euro, Austria dhe Italia me nga 4.8 milionë secila”, ka thënë ai.
Njohësi i ekonomisë, Safet Gerxhaliu, ka thënë se nga të dhënat e fundit të BQK-së shihet se ka rritje të remitancave. Ai ka thënë se diaspora është njëra ndër shtyllat kryesore të mbështetjes së Kosovës.
“Kur shohim se diaspora ka dërguar mbi 77 milionë euro më shumë këtë vit se në vitin 2022, është dëshmi se diaspora është njëra ndër shtyllat kryesore të përkrahjes së Kosovës”, ka thënë ai.
Gërxhaliu ka kërkuar që të shikohet mundësia që këto mjete të orientohen në zhvillim dhe të mos mbeten vetëm për konsum, por të kanalizohen në shërbim të zhvillimit dhe rimëkëmbjes ekonomike të Kosovës.
Ai ka theksuar se ndaj diasporës duhet të ketë më shumë përkujdesje, në mënyrë që ajo të mos mbetet vetëm burim i parave.
(r.m.)