Gjykata e Apelit ia kthen vulën e PD-së grupimit të drejtuar nga Berisha

Tiranë, 11 qershor 2024 – Emri, logoja dhe vula e Partisë Demokratike iu rikthyen të martën grupimit më të madh të opozitës që drejtohet nga ish-kryeministri Sali Berisha, pasi Gjykata e Apelit rrëzoi një ankimim të grupimit tjetër me në krye Lulzim Bashën.

Trupi gjykues i përbërë nga gjyqtarët Alma Ahmeti, Elona Toro dhe Iliba Bezati, pasi i dëgjoi pretendimet e palëve, vendosi të mos e pranojë ankimimin e firmosur nga deputeti Enkelejd Alibeaj, duke e lënë në fuqi vendimin e shkallës së parë, të marrë nga gjyqtari Agron Zhukri.

Gjyqtari Zhukri kishte njohur vendimet e Kuvendit Kombëtar të PD-së të mbledhur nga Berisha me firmat e një të katërtës së anëtarëve, ku u shkarkua nga detyra e kryetarit të partisë Lulzim Basha dhe organet drejtuese dhe partia do të drejtohej nga një organ i quajtur “Komision i Rithemelimit”.

Por, ankimimi i bërë në Gjykatën e Apelit nga deputeti Alibeaj, i cili në atë kohë u autorizua si kryetar partie, pas dorëheqjes së përkohshme të Lulzim Bashës, bëri që çështja të zvarritej ligjërisht deri në Gjykatë të Lartë, e cila në dhjetor 2023 e zhbëri vendimin e parë të Apelit që e njihte Alibeajn si palë në proces, duke e kthyer çështjen për rishqyrtim.

Me vendimin e fundit të Apelit duket se përfundon dhe saga ligjore më shumë se 3-vjeçare e partisë më të madhe opozitare, e cila që prej vjeshtës 2021 është e përçarë në dy grupime kundërshtare.

Beteja ligjore për vulën dhe emrin e partisë bëri që Partia Demokratike të futej e përçarë dhe të përjetonte një humbje të thellë në dy palë zgjedhje vendore, ato të pjesshmet në mars 2022 si dhe zgjedhjet e majit 2023.

Organet vendimmarrëse të procesit zgjedhor i njohën Bashës të drejtën për të përdorur vulën dhe logon, si dhe të përfitonte fondet e buxhetit të shtetit për zgjedhjet, ndërsa grupimi i Berishës garoi nën siglën e një koalicioni me partinë e aleate të ish-presidentit Ilir Meta.

Konflikti mes dy grupimeve lindi në shtator të vitit 2021, kur ish-kryetari i PD-së Lulzim Basha vendosi përjashtimin e Berishës nga grupi parlamentar, pasi ky i fundit u emërtua si person i përfshirë në korrupsion madhor nga Departamenti Amerikan i Shtetit.

Por, Berisha nisi një fushatë brenda partisë që kulmoi në janar të 2022-it me një sulm fizik kundër selisë së partisë, e cila u pasua nga ndërhyrja e policisë. Pas sulmit, kryesia e PD-së vendosi përjashtimin e Berishës dhe mbështetësve të tij nga partia.

Aktualisht “Rithemelimi” kontrollon pjesën më të madhe të partisë në terren dhe të grupit parlamentar, pasi shumë prej kundërshtarëve të dikurshëm u bashkuan rreth Berishës në këto vite.

Pas vendimit të Gjykatës së Apelit, deputeti Flamur Noka u bëri thirrje demokratëve që të rikthehen tek partia e tyre. Sipas tij, “..megjithëse në oazin e padrejtësisë, u gjetën gjyqtarë me integritet që i dhanë zë të vërtetës, e cila po zvarritej prej tre vitesh”.

(Reporter.al)

Comment

*