Tiranë, 5 gusht 2022 – Në Shqipëri, numri i nxënësve dhe stundentëve në 1.000 banorë ka pësuar rënie, në krahasim me vitet e shkuara.
Sipas Institutit të Statistikave (INSTAT) gjatë vitit 2022 ka pasur 136 nxënës dhe 44 studentë për 1.000 banorë, ndërsa 5 vite më parë ky raport ishte 153 nxënës dhe 46 studentë për 1.000 banorë.
Rënia më e madhe ndihet në arsimin parauniversitar, e arsyeja kryesore, sipas INSTAT, është se të rinjtë preferojnë të studiojnë jashtë vendit, por që ndikon gjithashtu edhe plakja e popullsisë.
Shkaktar tjetër i uljes së regjistrimeve në institucionet arsimore është edhe pandemia, e cila ka ndikuar në rënien e numrit të të diplomuarve.
![](https://www.illyria.com/wp-content/uploads/2022/08/image-640x400.png)
Nga ana tjetër, të dhënat tregojnë se gratë janë më të arsimuara se burrat. Sipas Anketës së Forcave të Punës të vitit 2020, me arsim të detyruar (arsimi 8/9 vjeçar) janë 54,0 % e grave dhe 43,8 % e burrave, ndërsa me arsim të lartë janë 18,9 % e grave dhe 16,6 % e burrave për popullsinë mbi 25 vjeç.
Por, shifrat përmbysen për popullsinë mbi 65 vjeç, ku vetëm 6,1 % e grave në këtë grupmoshë kanë arsim të lartë, kundrejt 14,4 % e burrave.
Nga ana tjetër diferencat gjinore vihen re edhe për arsimin fillor, ku rezulton se 75,4 % e popullsisë së grave mbi 65 vjeç është me arsim bazë, kundrejt 55,7 % e burrave.
(Top Channel)