Teheran / Tel Aviv, 28 shkurt 2026 – Irani ka nisur të kundërpërgjigjet ndaj sulmit të SHBA-ve dhe Izraelit.
Garda Revolucionare e Iranit ka thënë se ka nisur “valën e parë” të dronëve dhe raketave me cak Izraelin, duke paralajmëruar vazhdimin e sulmeve. Mediat iraniane kanë raportuar për lëshimin e “dhjetëra” raketave drejt Izraelit.
Raportohet se Irani i ka goditur edhe bazat amerikane në rajon (Bahrejn, Katar, Kuvajt) dhe objektiva të tjera.
Zyrtarë iranianë kanë thënë se të gjitha interesat amerikane dhe izraelite në Lindjen e Mesme mund të konsiderohen objektiva të ligjshme për sulm.
Një zyrtar amerikan ka konfirmuar se është sulmuar baza amerikane e Marinës në Bahrein, ku gjendet Flota e Pestë e Marinës Amerikane
Ministria e Brendshme e Bahreinit u ka bërë thirrje qytetarëve që të strehohen në vende të sigurta.
Një zyrtar i Katarit ka thënë se forcat mbrojtëse të këtij vendi i kanë kapur dy raketa iraniane mbi vendin e tij.
Forcat izraelitë të Mbrojtjes (IDF) kanë njoftuar paraprakisht se Irani ka lëshuar raketa drejt Izraelit.
IDF-ja ka deklaruar se sistemet mbrojtëse po operojnë për të ndaluar kërcënimet nga ajri të Iranit.
“Sirenat janë dëgjuar në disa zona në vend pas identifikimit se u lëshuan raketa nga Irani drejt Izraelit. Në këtë kohë Forca Ajrore e Izraelit po operon që të ndalojë sulmet”, thuhet në deklaratën e IDF-së.
Izraeli dhe Irani kanë mbyllur hapësirat e tyre ajrore, ndërsa Izraeli ka shpallur gjendje të jashtëzakonshme në mbarë vendin, duke ndaluar të gjitha tubimet dhe aktivitetet publike.
(r.m.)