Kosova e kujton dhe nderon ish-sekretaren amerikane të shtetit, Madeleine Albright

-

Prishtinë, 23 mars 2023 –Mikja e madhe e popullit të Kosovës, ish Sekretarja amerikane e Shtetit, Madeleine Albright, u kujtua e nderua në Kosovë të enjten, në një vjetorin e ndarjes nga jeta.

Presidentja e Kosovës, Vjosa Osmani, bashkë me Ambasadori amerikan në Kosovë, Jeff Hovenier, bënë homazhe dhe vendosën buqeta melule te busti i zonjës Albright në Prishtinë.

Presidentja Osmani ka thënë se populli i Kosovës do ta kujtojë përgjithmonë zonjën Albright, të cilën e quajti “fener shprese” në kohët më të errëta.

“Së bashku me ambasadorin e SHBA-ve, Hovenier nderuam ish-sekretaren Madeleine Albright në përvjetorin e ndarjes nga jeta. Populli i Kosovës do ta kujtojë atë përgjithmonë si një fener shprese në kohët tona më të errëta. Ne vazhdojmë të udhëhiqemi nga lidershipi shembullor i saj”, ka shkruar Osmani në Twitter.

Ambasadori Hovenier, në llogarinë e tij në Twitter, e ka cilësuar zonjën Albright mike të vërtetë të Kosovës. Ai ka thënë se puna dhe trashëgimia e zonjës Albright “mishërojnë partneritetin e fuqishëm” midis Kosovës dhe Shteteve të Bashkuara të Amerikës.

“Sot, iu bashkova presidentes Vjosa Osmani për të bërë homazhe për Sekretaren Albright në njëvjetorin e vdekjes së saj. Lidershipi i Sekretares Albright në regjion ka shpëtuar jetëra të panumërta. Një mike e vërtetë e Kosovës, puna dhe trashëgimia e saj mishërojnë partneritetin e fuqishëm midis dy vendeve tona”, ka shkruar ambasadori Hovenier.

Zonjën Albright e ka kujtuar edhe kryeministri i Kosovës, Albin Kurti. Ai ka theksuar se sekretarja Albright e kishte kuptuar thellë dhimbjen e të tjerëve dhe se gjithë jetën e ka kaluar duke mbrojtur lirinë, përfshirë edhe atë të Kosovës.

“Sot, një vit nga vdekja e saj, ne e nderojmë Madeleine Albright, diplomaten e njohur dhe sekretaren e parë femër të shtetit. Pasi u largua nga vendi i saj, gjatë Luftës së Dytë Botërore, ajo e kuptoi thellë dhimbjen e të tjerëve dhe e kaloi jetën e saj duke mbrojtur lirinë, përfshirë atë të Kosovës”, ka shkruar Kurti në Twitter.

(r.m.)