Këtë vit emisioni humoristik televiziv amerikan “Saturday Night Live” festoi 50 vjetorin e tij – me këtë rast po ripostoj këtë histori nga sezoni debutues, me një prej aktorëve themelues të trupës, shqiptaro-amerikanin e famshëm, John Belushi
Nga Ruben Avxhiu
Në 25 mars 1976, ishte rregulluar që emisioni i përjavshëm satirik, “Saturday Night Live” (Drejtpërdrejt Natën e Të Shtunës) do të filmohej nga Zyra Ovale e Shtëpisë së Bardhë.
President në atë kohë, ishte republikani Gerald Ford, i cili ishte personazh i përhershëm i skeçeve të emisionit. Rolin e tij e luante aktori komik Chevy Chase
Për të filmuar skeçin kishin udhëtuar Lorne Michaels krijuesi dhe drejtuesi ekzekutiv i programit si dhe aktorët komikë, John Belushi dhe Dan Aykrod, dy shokët që më vonë do të luanin filmin e famshëm “Blues Brothers”, si dhe Chevy Chase.
Sipas tregimit nga Michaels, kur vetura mbërriti në derën hyrëse të Shtëpisë së Bardhë, oficeri i rojes u kërkoi dokumentet e vizitës si dhe letërnjoftimet personale (ID). Të gjithë i kishin përveç John Belushit që ngriti supet sikur po i kërkonin diçka të pazakontë.
Lorne Michaelsit, i cili kishte luajtur shumë gurë për të të siguruar filmimin, i iku truri.
“Si ka mundësi të vish në Shtëpinë e Bardhë dhe të mendosh se nuk të duhet letërnjoftimi?” i tha ai duke menduar se planet për skeçin mund të anulloheshin dhe një leje e dytë mund të ishte e parealizueshme.
Mirëpo, oficeri i rojes, pasi futi kokën në makinë dhe i pa me radhë, tha për John Belushin. “Ky zotëria këtu nuk ka nevojë për letërnjoftim. E njoh se kush është”.
Në fakt, e gjithë Amerika e njihte.
Pas kësaj hynë lirisht dhe e realizuan filmimin. Në një fotografi me Presidentin Ford këtu më poshtë, John Belushi ndodhet në krah të tij.
Sigurisht në 1976 nuk kishin filluar ende vendosja e masave ekstreme nga frika e sulmeve terroriste. Sot nuk do të kishte ndodhur kurrë sado i famshëm të ishte Belushi.
John Belushi ishte djali i dy emigrantëve shqiptarë në Chicago si dhe vëllai i aktorit tjetër të njohur James Belushi. Ishte një nga aktorët komikë më të dashur të Amerikës. Vdiq aksidentalisht në 1981 nga një mbidozë droge.
