Prishtinë, 14 mars 2024 – Zyra e Kryeministrit të Kosovës ka konfirmuar se rregullorja e Bankës Qendrore të Kosovës që e ndalon përdorimin e dinarit serb në operacionet me para të gatshme në Kosovë ka qenë një ndër temat kryesore në takimin e kryeministrit Kurti me emisarin e SXhteteve të Bashkuara të Amerikësn për Ballkanin Perëndimor, Gabriel Escobar, të premten.
Në njoftim thuhet se Kryeministri Kurti “ofroi bashkëpunimin në adresimin e shpejtë të të gjitha shqetësimeve që bien në kompetencat e qeverisë”.
“Në lidhje me rregulloren e Bankës Qendrore, Kryeministri pati diskutim përmbajtjesor, të fokusuar në adresimin e shqetësimeve të përbashkëta. Ai tha se vendimi i Bankës Qendrore është vendim i një institucioni të pavarur dhe profesional. Për shkak të ndikimit të rregullores në komunitetin serb të Kosovës, qeveria ka bërë veprime për të siguruar që tranzicioni të jetë i shpejtë dhe i lehtë për qytetarët e Kosovës nga komuniteti serb. Në këtë drejtim kryeministri theksoi edhe propozimet që janë prezantuar për periudhën tranzitore dhe ofroi bashkëpunimin në adresimin e shpejtë të të gjitha shqetësimeve që bien në kompetencat e qeverisë”, thuhet në njoftim.
Edhe Kurti vetë, një postim në platformën X, e ka shprehur gatishmërinë për ta adresuar çështjen e dinarit serb, ndonëse në krye e ka shtruar nevojën që Serbisë t’i kërkohet llogari për sulmin e grupit të armatosur serb në Banjskë të Zveçanit.
“E falënderova për mbështetjen e SHBA-së dhe e theksova nevojën që Serbisë t’i kërkohet llogari për sulmin në Banjskë. Po ashtu e informova për hapat që i ka ndërmarrë Qeveria jonë në mbështetje të tranzicionit të rregullores së Bankës Qendrore të Kosovës dhe gatishmërinë tonë për të adresuar çështjet në të ardhmen”, ka shkruar Kurti.
Great to meet w/ @StateDept DAS Escobar. Thanked him for 🇺🇲's support and stressed the need to hold Serbia accountable for the Banjska attack. Also informed him of steps our govt has taken to support the transition of @centralbank_ks reg & our readiness to address ongoing issues. pic.twitter.com/hjUsIgJZQF
— Albin Kurti (@albinkurti) March 14, 2024
Emisari amerikan për Ballkanin Perëndimor, Gabriel Escobar, e ka cilësuar si çështje emergjente humanitare efektin që ka prodhuar Rregullorja e BQK-së mbi operacionet me para të gatshme, e cila e ndalon përdorimin e dinarit serb. Ai ka thënë se kjo çështje duhet të adresohet pa vonesë.
Escobar ka thënë se kryeministrit Kurti ia ka paraqitur disa propozime për zgjidhjen e problemit dhe se nga Kurti ka marrë poremtimin e so t’i shqyrtojë disa prej këtyre propozimeve.
“Kryeministri e pranoi këtë dhe më premtoi se do t’i shikonte disa nga propozimet që ia paraqita sot”, ka thënë Escobar, pas takimit gati dy orësh me Kurtin.
(r.m.)