Tregojuni fëmijëve se na keni vra
Na keni therrë me bajoneta
Të lidhur për trungje pemësh
Në fyt na keni pre
Tregojuni fëmijëve tuaj tregojuni
Mos ngurroni
Se ngurrimi është qyqarllëk
Tregojuni fëmijëve se çdo mbrëmje
Keni dalë të dehur në Francuska 7
Me xhepat e mbushur plot metafora
Dhe keni thirrë zëshëm
Vdekje shqiptarëve
Tregojuni fëmijëve se keni vrarë tinëz
Edhe fëmijët tuaj shpirtvirgjër
Për ta përligjur faqe botës
Vrasjen e fëmijëve tanë në masë
Si nacistët në Kragujevc
Tregojuni fëmijëve se keni nisur ushtarë
Policë dhe banda vrastare
Për ta shpikur edhe një fitore
Në Betejën e Humbur të Kosovës
Tregojuni fëmijëve sa na i keni dhunuar gratë
Dhe me gratë e dhunuara fëmijëve tuaj
U keni bërë vëllezër apatridë
Ata vëllezër që nuk do t’i takojnë kurrë
Tregojuni fëmijëve se na i keni vjedhur kufomat
Ku gjuha e ujit na e tregoi varrin
Derisa ju
Rivierës së Danubit kërkonit frymëzim të ri
Ngrituni tregojuni fëmijëve me zë
Se pas çdo fundi të zi
Njerëzorja kërkon lapidarin e vet
Kështjellë drite