Prishtinë, 15 gusht 2023 – Lëvizja Vetëvendosje ka njoftuar se Besnik Mujeci, i cili është arrestuar në Tiranë nën dyshimet për shpërndarje droge, është përjashtuar nga partia.
Mujeci, 40-vjeçar, është asamblist i Vetëvendosjes në Kuvendin Komunal të Prishtinës.
Njoftimi është publikuar nga ministrja e Drejtësisë, Albulena Haxhiu. Ajo ka thënë se “njerëz të tillë “nuk kanë vend në Lëvizje”.
“Komisioni Disiplinor mori vendim për përjashtimin e Besnik Mujecit nga Lëvizja VETËVENDOSJE! Veprimet për të cilat është arrestuar Besnik Mujeci janë krime të rënda dhe institucionet e drejtësisë duhet ta marrin dënimin e merituar!
Njerëz të tillë nuk kanë vend në Lëvizje”, ka shkruar ajo në Facebook.
Mujeci është në mesin e pesë të arrestuarve në Tiranë, të martën, të cilët janë të dyshuar për shpërndarje të drogë të llojit ekstazi në lokalet e e natës në zonën e ish-Bllokut në Tiranë. Droga është trafikuar nga Kosova në Shqipëri, me autobusë të linjës Prishtinë – Tiranë.
Të arrestuarit janë kapur në Tiranë me një dërgesë 11.300 tabletave ekstazi MDMA, me peshë 5.093 kilogramë. Sipas autoriteteve të Shqipërisë, vlera e drogës me të cilën janë kapur ata shkon në 400 mijë euro.
Përveç Mujecit, në operacionin e sotëm të policisë shqiptare janë arrestuar edhe Mithat Ramadani, 30 vjeç, gjithashtu banor i Prishtinës, si edhe Kalem Picari, 24 vjeç, Ambra Myftari, 28 vjeçe, dhe Daniel Avdija 26 vjeç, të tre banorë të Tiranës.
(r.m.)