Paris, 23 prill 2024 – Presidenti i Francës, Emmanuel Macron, ka zhvilluar të martën një bisedë telefonike me kryeministrin e Kosovës, Albin Kurti.
Pallati Elise ka bërë të ditur se Presidenti Macron ka shprehur përkushtimin e tij për dialogun ndërmjet Serbisë e Kosovës dhe ka bërë thirrje për zbatimin e plotë të marrëveshjeve të dakorduara në Bruksel dhe në Ohër.
Në komunikatë vihet theksin në kërkesën e Presidentit Macron për zbatimin e marrëveshjes për formimin e Asociacionit të komunave me shumicë serbe në Kosovë dhe kjo kërkesë vihet në lidhshmëri me aplikimin e Kosovës për anëtarësim në Këshillin e Evropës.
Presidenti francez ka shprehur keqardhje për dështimin e votimit për shkarkimin e kryetarëve të katër komunave veriore të Kosovës, ndërsa e ka cilësuar si të domosdoshëm organizimin e zgjedhjeve të reja sa më shpejt të jetë e mundur, me pjesëmarrjen e popullatës serbe.
Kumtesa e plotë e Presidencës së Francës:
Presidenti i Republikës bisedoi me telefon me kryeministrin e Kosovës, Albin Kurtin, këtë të martë, më 23 prill 2024.
Presidenti i Republikës e rikujtoi mbështetjen e palëkundur të Francës për pavarësinë e Kosovës dhe për integrimin evropian të saj.
Ai theksoi përkushtimin e tij për dialogun ndërmjet Serbisë e Kosovës, në mbështetje të ndërmjetësimit evropian, dhe bëri thirrje për zbatimin e plotë të marrëveshjeve të Brukselit-Ohrit.
Presidenti i Republikës e përshëndeti zbatimin e vendimit të Gjykatës Kushtetuese për Manastirin e Deçanit.
Gjithashtu, në kontekstin e aplikimit të Kosovës për anëtarësim në Këshillin e Evropës, ai e theksoi rëndësinë që i kushton Franca progresit të shpejtë dhe të pakthyeshëm në themelimin e Asociacionit të Komunave me shumicë serbe.
Presidenti i Republikës shprehu keqardhje për dështimin e votimit për revokimin e kryetarëve të komunave veriore të Kosovës. Ai tha se edhe më tutje është e domosdoshme të organizohen zgjedhje të reja, sa më shpejt të jetë e mundur, me pjesëmarrjen e popullatës serbe.
Le Président de la République 🇫🇷s’est entretenu par téléphone avec Albin Kurti, Premier ministre du 🇽🇰, ce mardi 23 avril 2024. Communiqué ⬇️
— Ambassadeur Olivier Guerot (@Olivier_Guerot) April 23, 2024
President Macron spoke on the phone with PM Kurti today. Communiqué below ⬇️ https://t.co/WLPyppo5wW
(r.m.)