Në analizat e mediave gjermane për situatën në pjesën veriore të Kosovës dhe për ngecjen e dialogut Kosovë-Serbi bëhet bashkëfajtore edhe BE-ja.
Në një analizë të gazetës “Die Welt” mbi zhvillimet në Kosovë, të hënën (08.08), theksohet se nën hijen e luftës në Ukrainë prej vitesh zien fort një konflikt tjetër në Europë. Para një jave në veriun e Kosovës pati protesta dhe bllokada rrugësh të serbëve militantë, policia raportoi për të shtëna.
“‘Vuçiq vetinskenohet si përfaqësues i interesave serbe’, thotë njohësi i Ballkanit dhe ish-drejtues i zyrës së dpa-së në Beograd, Thomas Brey. Këtë e duan votuesit. Dhe BE e lejon, ‘sepse ai është shpresa e vetme që t’i shitet popullit serb një kompromis me Kosovën.'”
“Die Welt” vazhdon me kritika ndaj BE-së.
“Vërtet që BE ka bashkëfajësi në shkallëzimin e situatës, thotë eksperti i Ballkanit, Bodo Weber nga Instituti Këshilli Politik për Demokratizimin në Berlin.
“Dialogu Kosovë-Serbi, që BE i dha shtysë me Marrëveshjen e Prillit 2013 dhe që duhet të çonte në një zgjidhje të konfliktit dhe njohje formale të Kosovës nga Serbia ka ngecur në krizë prej gjashtë vitesh…kjo lidhet edhe me atë që Brukseli, nuk bie dakord për një qëndrim të njësuar. ‘Unioni nuk reagon me një qëndrim, sepse interesat e shteteve të BE janë shumë larg njëra-tjetrës”, sipas ekspertit të Ballkanit, Thomas Brey.
Kurse gazeta “Berliner Zeitung”, në artikullin “Standarde të dyfishta”, shkruan se për një pjesë të lidershipit kosovar dhe për shumë vëzhgues perëndimorë dhe politikanë, Serbia shihet si sozia e Rusisë.
“Beogradi është i zemëruar për këtë debat edhe për arsye historike. ‘Nëse zhvendosja e kufijve -si në rastin e Ukrainës – nuk pranohet, atëherë për ne është standard i dyfishtë, nëse Serbisë i hiqet kjo e drejtë'”, citon “Berliner Zeitung” ambasadoren e Serbisë në Berlin, Snezana Jankoviç, që shprehet se dialogu me Kosovën është rruga e duhur.
“Por rruga diplomatike kërcënon të futet në qorrsokak, si në rastin e Ukrainës. Edhe aty u negociua me vite në kuadër të Marrëveshjes së Minskut, pa rezultate dhe pa qëllime të ndershme për të arritur një rezultat, si në çështjen e autonomisë për Donbasin.”
Kurse gazeta “Frankfurter Allgemeine Zeitung” (FAZ0, në një analizë për zgjerimin e BE-së, shkruan se qoftë për Ballkanin apo Ukrainën, BE-ja nuk mund të përballojë aktualisht anëtarë të rinj.
FAZ i referohet paralajmërimeve të presidentit Macron se BE-ja që tani nuk funksionon mirë e si do t’ia dalë me më shumë se 30 anëtarë me të drejtë vetoje në tryezë? Një BE me 36 anëtarë, e cila do të kërkonte parimin e unanimitetit në çështje kardinale do të ishte e paaftë për të marrë vendime, nënvizon FAZ.
“Por si qëndron perspektiva e reformimit të parimit të unanimitetit? Fondacioni Shkenca dhe Politika që e këshillon qeverinë gjermane për çështjet e politikës së jashtme, në një analizë ku e ka përmbledhur gjendjen, shprehet për marrjen e vendimeve për zgjerim mbi bazën e shumicës, ‘edhe duke pasur parasysh perspektivën e një BE-je me 30+ vende anëtare, pasi Ukraina dhe Moldavia e morën statusin e kandidatit dhe filluan negociatat e anëtarësimit me Shqipërinë dhe Maqedoninë e Veriut’. Shtrohet pyetja se ‘si BE me përmasa të tilla dhe me një heterogjenitet të tillë mbetet e aftë të veprojë.'”
Por, FAZ e sheh me pesimizëm arritjen e një reforme të tillë, edhe për shkak të rezistencës të shteteve më të vogla anëtare, si Polonia dhe Hungaria.
“Për heqjen e parimit të unanimitetit nevojitet unanimitet dhe për këtë nuk aspak unanimitet”, thekson FAZ
(DW)