Prishtinë, 5 shtator 2023 – Ministri i Punëve të Brendshme të Kosovës, Xhelal Sveçla, është kërcënuar me vdekje nga organizata serbe “Severna Brigada”.
“Unë personalisht do të të gjykoj (likuidoj), pritet vetëm momenti”, thuhet në komentin e dërguar në faqen publike të ministrit Sveçla në Facebook nga profili i organizatës serbe “Severna Brigada” (Brigada Veriore).
Kërcënimi ndaj ministrit Sveçla ka ardhur pak pas njoftimit për zbulimin dhe konfiskimin e një sasie të madhe të armatimit në Zveçan, në pjesën veriore të Kosovës, të banuar me shumicë serbe.
Zëdhënësja e Ministrisë së Punëve të Brendshme të Kosovës, Nora Fetoshi, ka thënë se rasti po trajtohet nga organet e sigurisë .
“Komenti, siç e keni parë, është bërë në faqen publike të Ministrit Sveçla dhe në kuptim të përmbajtjes së mesazhit, rasti tash po trajtohet nga organet e sigurisë”, ka thënë ajo.
Policia e Kosovës, gjatë një aksioni që zhvilloi të martën në një shtëpi në Zveçan, ka zbuluar e konfiskuar katër pushkë automatike, karikatorë, eksplozivë, granata dore, municione dhe pajisje të tjera.
Ministri Sveçla ka bërë të ditur se shtëpia ku u gjet armatimi është përdorur për grumbullimin dhe shpërndarjen e armatimit për grupet kriminale serbe.
Organizata serbe “Severna Brigada” e ka kërcënuar me jetë edhe Kryeministrin Albin Kurti.
Kjo organizatë ka shpërndarë disa here trakte kërcënuese për institucionet shtetërore dhe organet e sigurisë së Kosovës në katër komunat veriore të Kosovës të banuara me shumicë serbe.
Presidenti i Serbisë, Aleksandar Vuçiq, e ka mohuar ekzistencën e kësaj organizate, duke e cilësuar si trillim të institucioneve shtetërore të Kosovës.
(r.m.)